新年又來了。首先祝大家新年快樂！心想事成！想加人工嘅加人工，想炒老細嘅炒老細。唔知你有冇見過，每逢到咗新一年，Facebook、IG就會出現好多新年嘅目標，例如「我今年要轉工！」、「我今年要減肥成功！」、「我今年要學識煮飯！」⋯⋯不過，往往去到年尾，你問返呢啲喺年頭訂立新目標嘅人達成咗目標未，佢地可能會失咗憶：「我有講過啲咁嘅嘢咩？」又或者答你：「唉！算啦，都年尾喇，下年先算啦！」新年訂立目標呃like很容易，有心做一件事嘅人其實並唔需要用新年做藉口，反而佢地注意嘅係訂立目標嘅方法。

1.貼地一點

有時有啲人嘅目標可以好虛無飄渺又帶點離地。
「我今年要辦大事！」
「唔好意思，請問辦乜事？」
「唔⋯⋯我要諗條絕世好橋出嚟，整隻絕世好app！」
「請問你識寫app嗎？」
「唔識⋯⋯」
一個自己都冇能力實現嘅目標太離地了。不妨一步一步慢慢嚟，實現自己有能力做到嘅目標先。完成一個能夠達成嘅目標，再實現下一個，建立到成功感，咁先冇咁容易放棄。

2.畀個限期自己

「如果一定要加一個期限嘅話，我希望係一萬年！」咁就死得啦，等得一萬年，紫霞都死咗啦。訂立目標要有清晰嘅期限，為自己訂下一個個checkpoint，例如搵工咁，首先要限自己喺一星期內準備好份CV、每天都要上網睇新工、見到合心水嘅工作要一天內寄出求職信等等。如果有人訂立嘅目標係無限期嘅話，你都係當佢冇講過算喇。

3.具體實行方法

訂立目標最忌「講就天下無敵，做就有心無力。」喺Facebook貼張充滿自信嘅相，再加一句「我要乜乜乜」都係幾分鐘內完成嘅事。但當你深入啲去諗點樣可以達成呢個目標，就要定下確設實行嘅方法。問問自己，每一步應該點樣做？幾時應該要完成？如果冇諗過，咁即係得個講字。有啲人每年都好有目標，但當你問佢點樣做就啞咗，最終佢地嘅下場都會係「下年先算。」

4.係咪可以量度？

成功對於每個人嚟講都有一個唔同嘅標準。好多人每年都話講減肥，但永遠唔會講用幾耐去減幾多磅。目標應該係可以量度，例如三個月內減10磅、今個月要學識三味菜式，咁先可以為自己訂立成功嘅界線。

5.話畀人知

當以上嘅嘢都準備好，你就可以考慮喺社交媒體大肆宣揚，每完成一步都公報出嚟，等全世界一齊監察你嘅進度。就好似Facebook創辦人朱克伯格咁，佢早幾年為自己訂立一年閱讀26本書嘅目標，仲開設專頁同全世界人分享。攪到咁揚，做唔到就好冇面，呢個都係逼自己成功嘅一個好方法。

訂立目標其實隨時都可以，新年雖然係好時機，但實行起上嚟都要有plan。避免新年只係成為一個訂立目標嘅藉口，呃完like就算數。