疫情開始緩和，職場都開始回復正常。早排我哋喺網上做咗個簡單嘅意見調查，睇下有幾多打工仔因為疫情而改變工作模式，有人全時間work from home，有人分咗A/B Team，有人變咗混合工作模式（按工作需要而定），究竟有幾多人係想永續呢種自由同時又困身嘅生活呢？喺短短一個星期，我哋收集到過百份問卷，一齊睇下打工仔點睇！

上班安排完全改變 打工仔：滿意安排

一開始我哋問「喺2022年1-4月，你公司嘅上班安排有無咩轉變呢？」

• 40% 表示公司轉咗「混合工作模式」，可以按工作需要自由選擇返唔返office；
• 33.3% 嘅打工仔表示全公司轉晒 work from home；
• 只有 26.7% 表示公司轉咗 A/B Team 模式，輪流返公司；
• 回答問卷嘅打工仔都係幸福嘅，因為無人表示上班安排係無改變。

而當中近7成半打工仔表示滿意同非常滿意公司嘅安排。

滿意安排 但工作上有一定困難

雖然打工仔大部份都滿意公司嘅上班安排，但與此同時，環境轉變後工作反而有一定嘅困難。

• 30% 表示「同事之間溝通有困難」；
• 15% 表示「個人設備不及公司 (如電腦，網絡 等)，影響工作質素」；
• 10% 表示「工作文件大多數喺office，唔可以帶走 (如敏感資料)」；
• 10% 表示「屋企環境唔適合工作」

以上嘅結果都唔難理解，喺大家都見唔到面，或者有限度見面情況下，同事之間極其量只可以用電話或者WhatsApp做即時溝通，同以前喺office面對面溝通有一定分別。

另外，唔係每個人喺屋企都好似喺公司咁，有大嘅電腦螢幕同運算快嘅電腦工作，如果係用手提電腦做Excel或者Powerpoint嘅工作，真係隨時眼盲，如果需要列印文件就更加麻煩。

有部份打工仔嘅工作同客戶個人資料有關（例如銀行），就需要返公司先做到相關工作，喺屋企就變相係有限度服務。

而如果屋企無一個適合長期工作嘅位置，唔止影響工作質素，對身體健康都會有一定影響。

疫情緩和 大部份公司恢復正常

調查結果亦話畀我哋聽，73.3% 嘅打工仔恢復正常辦工，正式返公司，只有 13.3% 打工仔係仍然可以繼續在家工作 (work from home)，A/B Team 或者按需要返公司。

8成人想有需要先返office

喺問卷調查嘅最尾，我哋有問返打工仔嘅意願係點，有 80% 打工仔表示想未來可以按工作需要決定返office或者work from home，13.3% 想每日在家工作，只有 6.7% 想 A/B Team。（當然係無人想恢復正常啦）

總結

經歷一段長時間嘅改變，打工仔們已經習慣咗新嘅工作模式。雖然喺工作上會有一定程度嘅困難，但喺有得揀嘅情況下，打工仔仍然希望按工作需要而定。當然，調查入面只要睇下大家嘅意願，無包含到工作表演上嘅比較，因為呢類型嘅比較，都係公司嘅管理層同員工review先真實嘅。

其實，全球有好多間知名大企業已經選擇擁抱new normal，例如：Apple，Microsoft，Shopify，Slack， Spotify，Twitter同Upwork等等。但如果工作質素無下降，又有無公司會繼續呢個因為疫情而改變嘅工作模式呢？