打工仔要慳錢、Lunch 又唔想同其他同事Social、想早啲食完Lunch 係位休息下，帶飯都係一個好選擇。但帶啲咩餸菜都係一門學問，要兼顧營養之餘，仲要小心避免一啲唔可以放入微波爐嘅食材，否則有機會產生致癌物質，危害健康。部份食材更有機會喺叮熱時，產生火花，有機會造成爆炸。想食得健康又安全，記得帶飯時要避開下面嘅食材喇。

- 有綠葉嘅蔬菜
有綠葉嘅蔬菜﹙如﹕菜心、莧菜、菠菜等）含有大量水溶性營養素，用微波爐翻熱會容易令營養流失。而且，有綠葉嘅蔬菜內有一種物質叫「硝酸鹽」，會喺儲存或烹調過程中變成「亞硝酸鹽」（Nitrite），再喺身體嘅代謝過程中轉化為「亞硝胺」（Nitrosamine）。「亞硝胺」則有可能致癌。而且，用微波爐叮有綠葉嘅蔬菜，會令綠葉變黃，影響口感，所以唔建議帶飯帶有綠葉嘅蔬菜。

- 蛋

蛋係一種常用嘅食材，價錢平又充滿營養，但係帶蛋做Lunch Box 就要好小心！因雞蛋內部含有水份，而且蛋殼唔透氣，當中生蛋亦含有較多水份。當用微波爐加熱時，會令蛋入面嘅水分變成蒸氣，蛋殼內嘅壓力會不斷提升，容易導致爆炸。就算叮之前先剥咗蛋殼，蛋黃表面有層薄膜，加熱都同樣有機會引致爆炸。

就算帶太陽蛋、溏心蛋等半生熟蛋，卻有機會滋生沙門氏菌，就算用微波爐加熱，都唔可以徹底消滅細菌，所以都唔建議帶半生熟蛋做飯盒嘅食材。如果一定要帶蛋，建議帶無帶殼嘅炒蛋、蒸蛋等，避免風險。

- 蘑菇及薯仔

蘑菇及薯仔都唔適宜用微波爐翻熱，否則好易滋生細菌，引致肚痛。煮熟後嘅蘑菇應該要即刻食用，因為「翻叮」加熱有機會令到蘑菇中的蛋白質被破壞，食用後有機會搞肚痛。

而薯仔煮熟後同樣建議即刻食用，因為煮熟咗嘅薯仔如果無即時擺入雪櫃冷藏，放喺室溫環境太耐，會令肉毒桿菌繁殖。即使用微波爐翻熱，都唔能夠殺死細菌，只會令細菌繼續滋生。

- 辣椒

辣椒如果過度加熱，有機會著火，加熱過程中有機會釋放化學物質，可能會釋放有毒氣體。當你打開微波爐門時，有機會刺激雙眼並灼傷喉嚨。

- 油炸食物

油炸食品高脂肪、少水分，蘊含大量油分。用微波爐高溫加熱油炸食品，會逼出油分，令油飛濺到微波爐機身，產生火花，甚至有機會引致火災，所以都唔建議帶飯帶油炸食物做午餐。