情侶開口提分手困難，但其實打工仔要開口同公司辭職都唔係一件容易嘅事。職場好細，難保之後有一日你會返舊公司工作，或者有機會見返舊上司或同事，所以辭職都要有交帶，同舊公司好嚟好去，唔好留下負面嘅印象，所以點遞辭職信、幾時開口都好有學問!

想知辭職信點寫，可以睇: LINK

遞辭職信應該交畀邊個? 

為表尊重，你應該將辭職信交畀直屬上司。如果上司要由老細或HR口中得知你辭職嘅消息，會顯得唔尊重。

咩日子遞辭職信最好?

如果唔係有急切原因，辭職其實最好避開旺季 (Peak Season), 如果公司正處於繁忙時期或者你正負責非常重要嘅項目，建議可以等旺季或關鍵期後先遞信，咁可減低對公司或同事嘅影響，避免產生負面印象。

確實日子你就可以參考: LINK，好好計算自己嘅通知期。如果你係月薪計算，最好盡量計埋公眾假期或星期六日，賺多幾日!

咩時間遞辭職信最好?

決定咗邊日遞信以為就得? 其實咩時間遞信都有學問。建議你可以先了解上司當日行程，要唔要參加會議，就可以盡量避開上司繁忙嘅時間。你可以預先喺當日早上，同上司約定某個時間傾談，先畀佢心理準備，亦唔會打亂佢嘅工作。

遞辭職信黃金時間最好係下午4至5點左右，因為臨近放工時間，傾完收工就可以畀時間上司消化，你亦可以收工離開公司，避免尷尬。

辭職信應該交Hard Copy 定email?

同上司傾談時，你可以列印紙本辭職信再交畀上司。不過為保障自己，你應該喺傾談後，再補一個email 畀上司，再cc HR，防止之後有爭拗。

就算辭職當下對公司同上司充滿怨言，但都唔好表露出嚟。你應該喺遞辭職信時，向上司講幾句感激說話，再盡力做好交接。凡事留一線，日後好相見。