好多公司每星期都要開例會Update 一下大家嘅進度，一開就可能數以小時計。面對冗長嘅會議，忍唔住瞌眼瞓都無可厚非。但開會喺老細面前訓著係死罪，又或者一個唔留神，錯過一啲重要嘅訊息，扛工仔隨時萬劫不復。想開會嘅時候趕走睡意，打醒12分精神，快啲睇以下幾個貼士啦！

1. 開會前飲咖啡或茶

咖啡或茶含有咖啡因，有助提神，不過幾時飲咖啡或茶都係一個學問。好多人會選擇開會時飲咖啡或茶，但其實咖啡因係需要時間被身體吸收，開會先飲咖啡或茶係起唔到提神作用。有研究顯示，飲咗咖啡或茶後，需要約30-60分鐘先可發揮功效，所以開會前半個鐘最好飲定杯「回魂啡」，幫助開會時醒醒神。

2. 飲水

開會先飲咖啡或茶，身體會唔夠時間吸收咖啡因，發揮唔到提神作用。咁面對突如其來嘅會議又應該點算呢？你可以試吓係會議期間多飲水！咖啡因有提神作用好多人都知，但其實水都有提神作用！

人體有60%以上都係水份，水份可以加速新陳代謝，將養份帶到各器官，並且幫助帶走體內廢物，所以身體缺少水份，會容易引致疲累、渴睡。所以開會時可以帶杯水入去，不時為自己補充水份，趕走疲倦感。

3. 食香口膠

開會時唔適宜食零食提神，你不妨考慮食香口膠或薄荷糖提神。香口膠及薄荷糖都有薄荷成份，會畀人一種清新、醒腦嘅感覺。而且，有研究指出嚼香口膠時，口部持續開合嘅動作，可以為腦部提供較多氧氣及營養，亦可有提神作用。

4. 小心揀早餐

開會日嘅早餐應該盡量避免白麵包等含澱粉及糖份高嘅精製食物。呢類食品會令血糖快速上升，但急升後回落會令人更眼瞓、更攰。想開會唔再瞌眼瞓，你可以選擇食高纖、高蛋白、高鐵質嘅食物，如﹕烚蛋、炒蛋、黑麥麵包、牛油果、白肉及藜麥等，幫助提升開會時嘅專注力。

5. 去洗面
真係頂唔到眼瞓嘅時候，不如襯開會中嘅空檔時間，去洗手間洗個面。行去Toilet 走動下、轉換一下姿勢，再去洗手間用凍水洗個臉，刺激一下皮膚，都有助提神，幫助你之後喺會議中集中精神。

6. 按摩穴位

按摩適當嘅穴位可以幫助行氣活血，亦有助喺開會時提神。下次開會開到攰攰地，可以試下按以下穴道﹕
太陽穴﹕額頭兩側，位於眼睛後方嘅凹陷處，輕輕按壓約30秒。
風池穴﹕頸後面，靠近髮際線上方兩旁嘅凹陷處，可按3 – 5 分鐘。
合谷穴﹕即係「虎口」，拇指同食指合埋時，凸起最高處就係「虎口」。開會無精神嘅時候，可以輕按 1 分鐘，休息 10 秒，再按 1 分鐘，重複 10 次。

7. 開大冷氣、調光光線

環境幽暗、空氣閃焗都係令人昏昏欲睡嘅原因。開會前，可以先較低會議室溫度；開會時，一Present 完就即刻開燈，保持空氣流通、光線充足，開會都精神啲。