身處商務飯局中，可能你會發現一個現象，就係可能出席者彼此都係第一次見面，但不久之後總有一兩位人士能夠帶起話題，跟其他人熟絡起來。如果你都想喺商務應酬或飯局中跟其他出席者迅速打開話題，成功擴展人際網絡，若見到對方是「酒友」，不如試下就地取材，用酒打開話題。
5句用酒打開話匣子
1. 你鐘意飲乜野酒區 / 國家嘅酒？
問對方鐘意咩酒區，可以廷伸去法國、意大利、新西蘭......很好的Ice-breaking題材。
2. 你試過最好飲 / 最難忘係邊支酒？
總有一支係最愛，講下正面經歷係唔錯嘅開場白。
3. 今日Event你最鐘意邊支酒？點解？
一方面了解對方喜好，另一方面可請教前輩學習品酒知識。
4. 旅行時，會唔會特別安排去酒莊參觀呢？
好多人都鍾意去旅行，用酒莊切入，問吓人哋有咩旅遊經歷。如果對方去過酒莊，仲可以乘機問吓當中的經歷及經驗。誰都喜歡分享自己的開心事。
5. 你點睇Biodynamic或者Naturnal wine？
假如對方識飲酒，不妨同佢傾得深入啲，探討一下最近流行嘅造酒方法。
10個品酒術語，新手必備
應酬時支支都話好飲，唔通真係支支都淨係識講好飲咩，有冇其他形容詞可以用呀？等我分享10個品評葡萄酒的常用形容詞比大家傍身啦。
1. 烤多士香 ( Toasty )：飲香檳時，可以講有烤多士味。因為香檳的獨特製法，會產生典型烤麵包、多士的香氣，伴隨蘋果梨香。不過小心唔係所有氣酒都係香檳。
2. 好花香 ( Floral )：有啲酒會特別充滿花香，例如白酒Riesling 會有白花香，紅酒Pinot Noir 會有紫羅蘭花香。睇下個酒label 就有貼士。
3. 有果味 ( Fruity )：果味係好多葡萄酒會有嘅味道，可以分為柑橘類、紅果、黑果、熱帶水果等等。有啲酒係fruit-forward 風格，有啲酒會較複雜。例如一支靚波爾多左岸紅酒，除左黑加倫子香，仲會有煙草，雪松木味。
4. Fresh：形容高酸度白酒，感覺清爽怡人。例如Sauvignon Blanc、Chablis及Pinot Grigio。
5. Long length：形容餘韻悠長，通常質素較高嘅酒，飲完一啖，香氣久久不散。
6. 優雅：形容質感幼滑，清幽風格嘅酒，不是取勝於濃郁味道，各樣結構都平衡。
7. Powerful：形容勁度十足，濃味，厚身嘅酒。
8. 醫院味：形容有泥煤味的威士忌，有朋友會覺得似醫院味。典型泥煤味重嘅威士忌包括Laphroaig、Lagavulin及Ardbeg。
9. 吟釀香：又名 Ginjo-ka。飲Sake時，特別係吟釀或大吟釀風格，會有豐富嘅蜜瓜、香蕉及青蘋果香氣。
10. 濕葉味：多數用來形容啲陳年舊酒嘅味道，但唔好亂用。適當時候咁講，識酒嘅人就知你有做功課。
文：Crystal Chan
