特首林鄭的《施政報告》，實而不華。從內容可見，特首主張政府介入私人市場，與97年前「大市場小政府」的概念不同。同時對於一些郁得到嘅範疇，政府係肯狠狠去做嘅，例如建議拆咗灣仔稅務大樓及入境事務處而擴建會展。始終香港地貴，一班公僕返工就行遠啲。圍喺中間嘅鷹君中心食正是次發展地利，雖屬地產股 ( 旗下信託持有花旗銀行中心及不少酒店等 ) 而其業務間接受工廈改建而影響 ( 如成功 )，不過「有沙有糖」之情況下令市場人士唔敢亂沽041，令鷹君股價上午收市只跌0.48%。

首置上車盤估計短期對地產股是壞消息，不過數月之後應會成為好消息。數目在此：由於建議收入限在52,000至68,000元 ( 家庭 )，在估計政府不建議供樓者拎出超過四成之薪金去作供款，首置者應只會用52,000 x 40% = 20,800╱月去供樓。而此供款攤30年供，可借2.08 x 2.59 ~ 5.6百萬。換言之首置盤的售價估計仍高達500至600萬元，就當唔收地價賣價打七折，估計低層單位仍要400餘萬元。咁嘅價碼喺安達臣道買個低層單位，那不如比400萬元買港鐵站隔離大興花園，呢個價要方便，二手私樓大把選擇。

至於不少人詬病首置單位數目少，筆者應為政府對此新房策在執行上小心翼翼，因首置定價會好影響市場。過往香港的房屋架構是未補價居屋100至300萬元，再無錢就申請公屋，有錢就私樓，故不少新樓入門都由400萬元起跳。今時今日在居屋同私樓當中加一層首置，係買咗10年後先可沽的首置，其定價將會影響私樓市場生態。估計政府是先比1,000試下反應，萬一無人肯用400萬元買就再減，變相多一個影響市場的「按鈕」。

今日下午地產股先跌後回升，看法是一聽首置眾人將地產股「先沽為敬」。但慢慢發覺首置的定價除了可壓制樓市，亦可將價調高去為發展商新盤包底。此情況下地產股當然於下午再升。已在早早前講過，新世界 ( 0017 ) 自上任特首以來投地表現出眾，150萬元平方呎農地處最後洽談轉換階段，今時進入收成期。至於你問樓價會唔會跌？其他整體樓價升跌要看外圍，而政府亦唔會咁傻去推跌樓價。

筆者自己就真係去過安達臣道，一幅喺2009年或之前已在平整的工地。要由嗰處落返觀塘要行清水灣道，交通不太便利。如果平都可以諗，但超400萬元加上冇得賣，那就好難諗。故市場第一反應是聽到政府肯出力干預市場，一眾地產股固然下跌。惟是否真可推跌樓價或地產股，要看其價單先知。不過應唔會大平賣。不過有點幾可肯定，是特首愛自己出手干預樓市，多於同私人地產商合作去干預市場。可能過去幾年官商勾結新聞太多，為了避縑不如親自出手。

同私人地產商合作，多從「搵地小組」這些商界糅合的部門開始。唔知係唔係有人收到風知道「搵地小組」無運行，阿姐唔關照。於《施政報告》發出當日生果報出了單「土地小組成員擁8萬呎棕地無避席」的新聞，應了湯博士一早話：「搵地小組其實是棧道兵」呢件事。發現原來正將就係阿姐自己，落Order攪首置同鏟起灣仔。有些搵地小組成員如果想囤地而早知內幕消息而得益，恐怕打唔響算盤。擁有農地及舊樓重建，近年少買地的恆基，在政府只想同私人發展商一齊起樓，而唔係搵地然後Set個靚位比發展商自己賺晒的情況下，恆基_( 0012 ) 跌得最慘，跌4.5%。多得早兩位特首都同商界有些疑似官非，本任特首一條心自己做，少同地產商協調，可能真係殺出血路。若推到樓市跟外圍大跌而舒緩買樓熱，林鄭十年將可「開個靚頭」比葉劉睇睇。

筆者估計工廈改造只說而難做，因利益持份者太多，萬一工廈真改建到住上萬千家庭而無人買樓，地產小子或囤地同胞咪要入去放火？有時講到錢，有啲人真係可以去到好盡。因此林鄭在工廈一事語氣好有保留，搞到都應該唔喺頭五年。

圖：Shutterstock

以上文章刊於《招職》。