香港作為世界第一嘅OT之都，喺每個人嘅職業生涯當中遇到幾個OT狂（A.k.a 工作狂）上司都係非常合理嘅事。OT狂上司看似有無限精力、唔使食飯、唔使瞓覺、無需私人生活，每日由朝到晚都喺公司打拼，真係好得人驚。作為OT狂上司嘅下屬，自然會感受到無比壓力，最怕佢期望啲下屬做到佢咁樣先叫合格。好多老細都鍾意下屬OT加班，用工作時間長短去衡量工作表現，做成「OT先係好員工」嘅文化，係非常落後嘅思維模式，甚至影響整個機構員工嘅工作表現。

1. 效率降低

你有冇見過夜晚9點都喺公司吹水嘅同事？其實夜晚晚點解唔快快手手攪埋啲嘢返屋企休息？最大原因可能無因為房入面嗰個未走。啲嘢明明可以快快手手做完，又或者聽日先做都唔遲，但大家為咗搏表現，驚老細唔鍾意，所以個個都加班OT繼續做。甚至有部分人會為OT而消磨時間，得閒吹吓水將啲嘢拖長嚟做，避免接更多新工作。其實咁樣更加影響工作效率，所以有時OT都未必係一個好現象。

2. 人才成長慢

OT狂上司點解要成為OT狂？除咗佢真心熱愛自己嘅工作之外，另一個原因好可能係因為佢「唔識放手」。當升到上管理位置，工作內容開始會有大改變，要多花時間去做決策，如果連以前嘅工作都攬住唔放，自然要OT到通宵。除咗自己做得辛苦之外，其實同時剝削咗下屬嘅學習機會，令人才唔能夠有效成長。有啲工作需要開始放手畀下屬處理，信任佢地可以增加佢地嘅自信心，就算錯咗都可以從錯誤中學習，從而增加佢地嘅工作經驗同判斷能力。

3. 唔識安排工作

Time Management係一件唔容易嘅事，當乜嘢都攬埋上身做，自然要OT至夜深。蘋果教主Steve Jobs就講過「專注意思係要對其他幾百個好Idea說『不』」；英特爾前總裁Andy Grove亦講過，佢每一日完結返屋企唔係因為完成工作，而係因為攰，因為我地總係會有更多工作要去做。

4. 員工健康

OT危害健康係事實唔係口號，個個睇住老細幾點收工，希望老細離開時都仲見到自己辛勞工作嘅身影，以留下良好印象。結果員工被逼留守公司，缺乏休息時間，冇咗私人生活，生理心理都唔健康，直接影響每日嘅工作表現。到有一日頂唔順，人才就係咁流失。