時間好寶貴，阿豬阿狗都知。不過，老細和上司不是阿豬阿狗，是英明神武的領導人，在他們心目中，他們的時間是時間，下屬的時間是垃圾。

我份人好勻真，有嗰句講嗰句，我不會說今時今日「有返工冇放工」。這樣說，肯定講大咗。不過，打工仔要平平安安準時放工，絕對是奧運金牌級的挑戰，肯肯定無誇張！

因為，放不放到工，除了講工作量和你的辦事效率，仲很講究運氣。講白點，是你老細會唔會情緒到到，臨收工才發神經。

好像昨天般，小弟和成Team人又中招。五點九，我執好晒嘢，準備返歸。其實這鐘數早已OT，不過我要求低，走得到已好感恩。嘿，剛拿起公事包，老細就好似侏羅紀公園的速龍，不知從哪個暗角撲出來，咬住唔放。

「你今天有緊要事？」老細貌似體諒下屬，徵詢過你架。

「都無乜緊要嘢嘅。」係，我認我冇吉士，不敢據理力爭。你老闆丫，我夠鐘放工，你理得我有無緊要嘢！

「咁啱啦，公司有緊要嘢。叫埋班兄弟開會，好快，講一陣就完。」三歲細路才會信你「講一陣」好嗎？

公司有要事，我不是不理解，但為甚麼不在「辦公時間」開會，偏要臨放工 ( 重申：其實已過放工時間 ) 才來開會呢？我強調，不是交代幾句要事，係開會！

係打工仔都知，開得會，沒有一頭半個鐘，不可能散會。偏偏，老細及上司在這個時刻，通常都特別長氣，長氣過阿媽！

重點是，整個會議的內容，完全不覺得有急切性收工才開會講囉。根本就是老闆心理變態唔抵得你「準時」放工！