你身邊有冇一種人，成日都話要辭職，但每次再見到佢，佢咁多年嚟都仲係做緊同一份工？出親嚟食飯，講起份工、講起老細，佢都一定鬧到媽媽聲，不過一問佢幾時轉工，佢都係話：「睇下點，應該快喇。」身體永遠很誠實，結果三年又三年，鬧完又再鬧，咁多年都仲係打緊同一份工。點解佢地成日得個講字都離唔開份工？或者係因為辭職理由。

1. 老細對佢照顧有加

如果女兒係爸爸前世嘅情人，老細就一定係你前世嘅仇人。你諗下，如果你前世嘅仇人呢世做咗你老細，但佢唔單止冇對你有仇報仇，反而仲對你愛護有加，仲唔係化解前世嘅恩怨嘅好機會？ 人唔知要積落幾多陰德，今世先可以遇到個好老細。呢位成日話轉工又唔轉嘅朋友，雖然唔係好鍾意間公司、人工又唔係加得多，但勝在有位好老細。要轉工，真係唔係話轉就轉。

2. 害怕改變

人類天生係鍾意穩定，當習慣停留喺一個地方，慢慢就會形成一個comfort zone（舒適區)。 工作往往都係一個難以逃離嘅Comfort zone，改變永遠需要很強嘅決心同動力，好多人都因為太舒適，過得一日得一日，最終放棄自己轉工嘅想法。對改變後嘅恐懼，同樣令人唔敢踏出第一步，「唔知會唔會仲衰過而家，咁不如唔變好過變啦。」害怕改變，往往係轉工嘅最大障礙。

3. 唔知轉咩好

阻礙人轉工嘅另一個障礙，就係自己都唔知轉咩工好。當一個人做咗幾份工都仲未搵到自己要行嘅路，難免會變得好迷惘。「係就係唔係幾滿意而家份工，但係轉份咩工好？其實我自己都唔知。」連自己都唔知自己要啲咩，咁唔怪得佢成日得個講字。不過如果佢咁多年都未搵到辭職的原因，就係時候勸佢踏出第一步喇。

4. 加咗人工升咗職

有一種人雖然成日鬧公司鬧老細，不過唔聲唔聲其實喺公司升職又加薪。難得搵到份發揮到又有回報嘅工作，自然唔會輕易離開啦。把口就係咁鬧公司，但其實老細已經加咗佢唔少人工，試問佢又點會咁輕易轉工。下次佢再話轉工？你咪再信佢喇。

5. 唔捨得同事

有時做決擇係好困難，雖然係唔係幾鍾意份工，又唔係幾鍾意個老細，但最唔捨得嘅始終係班好同事。一份工有一班好同事唔容易，佢地好多時係支持我地工作落去嘅動力。一直辭唔到職，可能就係因為唔想掉低呢班出身入死嘅好戰友。

6. 其實好愛份工

正所謂打者愛也，鬧佢係因為太愛佢。講公司、老細壞話，其實都只係想佢好。辭職？從來冇諗過，一直都只係你地班人嘅天真幻想。對公司嘅愛有如深海一樣，深信自己總有一日可以改變到公司，改變到世界。下次佢再話想辭職，只需應佢一句「哦！好呀。」