返工搭車淨係識煲劇？一招幫你充實自己

打工仔除咗要適應朝9晚6嘅生活模式，第二個困難應該係漫長嘅搭車時間。話説香港作為彈丸之地，竟然有唔少人返工來回都兩三個鐘，跨區工作嘅打工仔就明白，計計埋埋，一年分分鐘有一個月嘅時間係浪費喺搭車上面。

返工來回三個鐘就一定係浪費時間？

車程咁長，唔單止私人時間少咗，又要早起身搭車個人都無乜精神。有時唯有逼自己撳手機，碌Facebook/ IG，煲下劇，睇下新聞去Kill Time。

不過如果你同小編一樣成日暈車浪，搭車無論睇手機定係睇書都覺得唔舒服。唔想嘥咗搭車嗰三個鐘，仲可以做啲咩？

如果想利用搭車時間學嘢嘅不妨試下聽Podcast，大部分節目都好有學術成分，聽完會有唔少靈感同新收穫。

Podcast係iPod + Broadcast嘅英文合義詞，主要以聲音為主，同聽電台差唔多。不過同傳統廣播唔一樣，Podcast係預先錄製好，所以可以隨時隨地揀自己鍾意嘅節目，例如人物訪談、知識說書、新聞時事、金融投資等等。大家只需要用耳仔聽就可以學到好多新知識，搭車嘅時候就可以俾眼仔休息下。

香港人目前仲未流行聽Podcast，所以可能好多人無乜聽過。其實iPhone已經內建咗一個app俾人免費聽Podcast。想同時兼顧iOS及Android系統嘅可以揀Spotify。Podcast有好多唔同類型嘅節目，大家可以根據興趣搜索自己鍾意嘅內容。

人在職場總會需要用英文交流，想練英文聽Podcast就啱晒。不過學語言至忌格硬嚟，最重要係搵啱類型嘅英文嘢睇。推介節目：Ted Radio Hour、No Stupid Questions、Freakonomics Radio、Planet money。

廣東話Podcast相對嚟講係比較少，但有唔少節目好俾心機整，大家可以聽下支持更多本地Podcast。推介節目：講經Talkshit、Isaac創業行銷分享專欄、五夜講場 - 哲/史/文/社科/科學。

睇完呢篇文，你可能發覺返工時間長唔係一個缺點，反而俾咗機會你利用零碎時間去累積知識。反正都揀咗呢份工（當然可以轉工啦，離地啲甚至可以搬屋），不如樂觀啲面對漫長嘅返工之旅。打工仔不妨利用搭車時間進修學嘢，用新知識鞏固行業競爭力。

如果睇完都仲想轉工，試下嚟呢度搵下有無心水好工喺你附近。