遞信炒老細魷魚呢個決定，對每位打工仔嚟講都係一個重要決定。你可能喺公司做咗好耐，想尋新發展、又可能因為係唔滿意份人工、又可能因為老細太衰而選擇離開，不過，無論咩原因都好，遞信後都有幾件你必須要知道嘅事。

1. 辭職信要寫清楚

收得辭職信多就知原來好多人都唔係好識寫辭職信。要搵辭職信sample或格式，問google大臣已經可以搵到唔少，但依然有好多人會寫漏嘢。是咁的，有幾樣嘢辭職信一定要有，包括遞信日期、last day同埋簽名。遞信日期同last day係用嚟計算你嘅通知期，而簽名就係證明係你本人遞的信。呢幾樣看似好基本，但原來好多人都會唔記得做。

2. 你不是無敵的

見過有啲同事，入老細房辭職前，坐喺公司日日面容扭曲，但遞完封信出嚟之後，個樣即刻寬容曬，好似世界又再充滿希望嘅樣子。辭完職嗰一刻，的而且確會有種如釋重負嘅感覺，又真係幾爽嘅。不過無論幾爽都好，辭咗職都唔會好似Mario食咗星星咁進入無敵狀態，可以喺公司橫衝直撞。早前twitter就有一位行將離職嘅顧客服務部員工，喺離職前攪到美國總統Donald Trump個帳戶出唔到post 11分鐘，攪到Trump Trump後嚟都要出post譴責。

一般嚟講，辭職需要根據合約畀適當嘅通知期，喺通知期結束前一刻你都應該要保持作戰狀態。雖然你係辭咗職，但如果你有心玩嘢，或者做咗啲違反守則嘅事情，就算係去到通知期最後一日，公司一樣可以炒你。

3. 手尾要跟好

「今日留一線，日後好相見」作為一個負責任嘅人，喺短短嘅通知期裡面應該盡力安排順利嘅交接，令同事同老細都對你留低好印象。如果你老細一向待你不薄，更加要加多幾錢肉緊幫佢攪埋啲手尾。如果遇著啲麻煩老細，刻意為難，記得只要盡咗自己嘅責任就足夠，離開地獄之期已不遠了。

4. 工作證明唔一定有

大家離職嘅時候都會想有返一份工作證明，方便將來搵工。喺離職之後，雖然一般公司嘅HR都會主動提供一封工作證明信，但呢樣嘢其實唔係必然。見過有啲求職者未能提供工作證明，原來係因爲舊公司要收到要求看會出。如果唔清楚公司會唔會出，不妨問一問離職前問清楚HR。

5. 搵老細寫封推薦信

除咗HR嗰封基本嘅工作證明，好多求職者都會想要一封靚靚仔仔，證明工作有好表現
嘅推薦信。但呢封信就要自己親自向老細提出要求，睇下老細肯唔肯寫畀你。如果你工作表演係不過不失，上司下屬關係尚算良好，我諗大部份老細都係樂意寫嘅。