香港地生活節奏急促，秒秒鐘幾廿萬上落，好多公司少咁個人就踢曬腳。一請到新人，就會要求佢地短時間即刻上手，做到好似舊人咁快手。通常新人最脆弱嘅時份係頭一個月，HR最怕就係請咗個新人返嚟，一轉眼就話因為頂唔順而瞬間辭職。如果可以嘅話，其實對新人好啲，佢地對公司印象好啲，員工自然會肯留得長啲。

1. 第一印象好緊要

記得有位辭職同事投訴，佢第一日返工，咩都仲未識做，隔離位個同事就粒聲唔出咁將啲一座座喜馬拉雅山咁高嘅文件山搬嚟佢枱面，然後完全冇人話比佢知要做乜。第一印象往往好重要，當佢一開始已經有負面印象，慢慢就會將呢種印象無限放大。如果當時有人願意講解清楚，呢位新同事就唔會第一日返工已經唔鍾意公司，最後唔會令佢咁短時間內決定「跳船逃生」。

2. 照顧下職場新人

一個新人返工，人生路不熟，初返工時個個都唔識，孤獨冇照應，呢段時間係最難捱。我地可以做嘅就係令佢地盡快熟習環境，縮短呢段時期。有啲公司會幫新返工同事搵一個Mentor或者Buddy，幫佢地盡快融入新環境。雖然呢啲可能係人手比較充足嘅大公司先做到，但其實關心下新同事呢啲嘢唔使咩政策，每個人主動啲都可以做得到，將心比心，你都唔想返新工，你啲同事唔理你架。

3. 做好迎新

迎新呢家嘢，有嘅時候大家可能覺得好無聊，但冇咗其實又會好覺眼。記得以前喺某公司做嘢嘅時候，因為每個月返工嘅人數眾多，好多時迎新都迎唔切。好多員工可能做咗幾個月都未去迎新，出現迎新嘅員工一啲都唔新嘅怪異情況。每次上完迎新之後，有好多員工都投訴想早啲嚟迎新，咁一開始應該會冇咁辛苦。雖然迎新不外乎介紹下公司、文化、架構，但其實呢啲都係好重要，因為可以幫新同事了解公司嘅核心價值、工作嘅文化，唔使靠自己「摸熟」環境。更重要嘅係，迎新可以比到員工受到公司歡迎同重視嘅感覺。

其實人唔係機器，好多嘢唔係㩒個掣就識做。就算之前幾有經驗，去到新公司新環境都一定會有唔熟習嘅地方。善待新人好重要，一開始都唔留個好印象比人，叫人地點有信心喺你公司長做呢？