到咗年尾，又喺時候要㩒入公司個人事系統，睇下同事們嘅大假日數。因為公司有policy，一定要同事清一定數目嘅年假，所以又係時候要提一提同事清假。做咗幾個年頭，就會發現出現喺清假名單上面嘅人通常都分三種：

第一種叫「有假唔放的人」，呢種人通常都係自願性工作狂，年假嘅日數對佢地嚟講從來都唔重要。每次提佢地放假，都會聽到：

「下？有咁多日咩？我好似冇幾耐之前先清過。」

我答：「係呀，你上次放假已經係一年前。」

如果唔係去到非請不可，佢地都唔會攞假。

我相信如果年假有得轉讓，我相信佢地係會講一句：「攞去洗啦。」

第二種叫「放假放到盡的人」，呢種朋友習慣性咁將年假儲起，令年假長期維持喺雙位數狀態。不過要佢地請假一啲都唔難，因為一切其實已經喺佢掌握之中。正所謂去旅行去到盡，佢地會一次過拎曬啲假，然後你會成個月都見唔到佢喺公司出現。

最後一種，亦係最慘慘嘅一種，係「痛失請假的自由的人」。佢地雖然都係清假名單嘅「慣犯」，但就從來都唔係自願出現喺上面。當問佢地唔請假嘅原因時，佢地都好無奈咁話攞唔到假。一句句辛酸，聽到眼淚水都流。好多人攞假自己想攞邊日就攞邊日，但佢地就失去咗呢個自由。原因有幾個：

1. 放假日子限定

好多工作都有淡旺季，有啲部門會限制同事喺某一啲日子裡面一定唔可以攞假。例如某啲公眾假期公司生意特別好，打工仔如果喺呢啲日子提出攞假，簡直同自殺冇乜分別。雖然淡季嘅時候攞假會比較容易，但就要同所有同事爭住攞，從來都唔能夠自由咁放假。今次爭唔贏，旺季又嚟喇。

2. 只能夠被安排

為咗令人手好安排啲，有啲老細甚至會喺編更嘅時候幫同事編埋大假，直頭係你嘅人生由佢話事。想買平機票？唔好意思，等更表出咗先，不過等得更表嚟，平機票又唔等你了。明明係屬於自己嘅時間，但都要被安排。

3. 有個放假狂老細

有啲公司有不明文規定，老細放假，下屬唔可以一齊放。其實都好正常，老細唔喺度，點都要有第二把交椅頂住先。不過如果你老細係一個放假狂，你想放假就難上加難。曾經聽朋友講過一個case，公司裡面有個老細經常放假，病假、事假、年假乜都請，成個月都唔知有冇一半時間喺公司做嘢。可憐嘅係佢下面個Manager，因為咁而長年無休。自由咁請假？對佢嚟講太奢侈了。

如果你有位可以畀你自由咁請假嘅老細，比起好多人嚟講，都可能已經算係一種小確幸。