自從WhatsApp、WeChat等即時通訊Apps流行，好多打工仔都覺得冇晒私人空間，老闆或上司鍾意幾時搵你就搵你，完全唔使擇日、唔使睇幾點，24小時全天候Order你做嘢，毫無顧忌可言。

曾幾何時，上司打電話給你，尚且看看時間，太夜了，都不好意思打擾你睡覺。現在？要Send就Send，當正你係Friend。反正人人都係咁做，社會文化如此，職場風氣有乜辦法唔跟住變。

公道啲講，WhatsApp本來不算十分滋擾。社會共識係：我發訊息比你，無叫你即刻覆，你沒空，大可隔一段時間才覆。今時今日，有些人甚至覺得，搵人先發個訊息係禮貌，無端端打比人仲唐突。

可惜當上述情況換了情人或上司下屬關係，一切都唔同晒。

港女女友搵你，秒回是常識吧，違者好自為之。

老闆上司搵你，好少少嘅，15分鐘內回覆是極限，違者後果自負。

同事Kary說，那次老細11點幾WhatsApp佢，她沒留意，翌日上班被寸到想搵窿捐。

同事Andy就話：「你睇唔到咪算囉。我呢排晚晚臨瞓著就被老細的WhatsApp通知搞醒，跟住半晚都瞓唔返。」

我笑佢電腦白痴，不懂關掉Apps的聲響。豈知笑完人好快就有報應。

那晚老細11點半WhatsApp我，小弟電話放牀頭卻時運高睇唔到。結果，12點佢索性直接打比我！

「做乜唔覆我Message，你唔似會咁早瞓。聽朝個會準備成點？」老細半夜搞醒你，仲可以先發制人指責你，問你服未？

話時話，當晚適逢農曆七月十四，這電話簡直係午夜凶鈴，心血少啲都俾佢嚇死。