「開會」呢兩個字可以好沉重，入房到離開一刻隨時花你個零兩個鐘，嚴重起上嚟半日都開唔完，結果搞到你聽到「開會」兩個字就頭痛。如果你發現自己每次開完會第一件事就係想去廁所，咁未必係你身體有問題，而可能係證明你開會時間太長了。筆者有朋友份工每一日嘅Schedule都係被會議塞滿，經常因為開會而冇時間處理自己嘅工作，結果晚晚都要OT到夜深。
「開會」呢樣嘢本身唔可怕，會議如果係開得有效率、有建設性，其實一啲問題都冇。問題只係開會嘅方式，或者係參加會議嘅人出咗啲問題。
開會冇目的
呢個世界有一種會叫例會，即係有冇事都要開嘅例牌會。睇宮廷劇睇得多，古時文武百官上早朝，佢地凌晨3點起身準備，5點鐘準時上朝，然後第一句開場白就係：「有事啟奏，無事退朝。」即係話你可能係凌晨3點起身，去參加一個隨時即時散會嘅會呀！你話幾浪費資源。嚟到現代公司嘅例會，其實都係類似嘅制度，不過喺例會面對老細，更加冇「無事退朝」呢支歌仔唱，就算無事都唔該你搵啲嘢講，結果都係大家一齊浪費時間。如果你老細仲用緊古時嘅方法開會，真係唔該佢Update下。
Tesla嘅CEO Elon Musk就對開會有特別嘅見解。佢為咗加強公司嘅生產力，決定除非有緊急議題，公司要取消所有定期會議，亦即係例會。開會應該係為決策，如果會議目的只係匯報，咁其實Send個e-mail都得，何必搵齊咁多人嚟開會。
開會人數出事
你有冇經常參加過十幾廿人嘅會議？開會呢樣嘢喺公司係無可避免，如果會上有太多唔關事嘅人喺度，一來你一句我一句會大量浪費時間，二來唔關事嘅人坐喺度都係浪費緊公司資源。蘋果教主Steve Jobs、Tesla嘅Elon Musk及Amazon嘅Jeff Bezos都認為會議唔應該有太多人。Steve Jobs就盡量確保開會人數減至最少。Elon Musk甚至叫員工如果發現個會唔關你事，就唔該你即刻走。至於Jeff Bezos就提出有名嘅兩個Pizza論，佢話如果會議入面嘅人兩個Pizza都餵唔飽，就證明參與會議嘅人太多。如果計返香港人嘅一般食量，可能唔駛兩個Pizza都夠喇。
