「空白期」呢幾隻字，對於好多想辭職休息下嘅打工仔嚟講，就好似佛地魔嘅魔咒一樣咁恐怖。我聽過身邊有朋友講過，無論佢幾唔鍾意份工都好，佢都唔會選擇比自己有空白期，因為佢好擔心：「有空白期搵工會好麻煩，而且驚搵唔返之前份人工。」
佢好擔心冇咗份工喺手，自己會少咗議價能力，容易被人壓價。另外去見工嘅時候，被問到點解有空白期，會被人問到口啞啞。
當自己履歷表 ( CV ) 上面有空白期，我地就好容易好似「身有屎」咁。搵工搵得耐冇回音，就會開始懷疑，其實係咪因為有空白期所以冇人請？係咪我人工要求太高？唔通要減價先有人請？然後開始試吓自降身價。但事實上，呢種擔憂又係咪一定係真？如果你都有過呢種擔憂，或者可以先睇下以下呢幾點。
1. 空白期有幾長？
擔心空窗期會唔會影響搵工，先睇下自己個空白期有幾長。如果你嘅空白期只係幾個月，其實影響係好有限。幾個月時間基本上唔會同市場或你自己嘅行業有好大嘅脫節，好多人都搵得返之前嘅人工又甚至提高少少都仲得，完全唔需要自降身價。但如果空白期以年計，影響就會比較大，人工就好視乎你嘅經驗同專業程度了。
2. 一個言之成理嘅理由
空白期最怕見工時唔知點解釋，其實唔需要諗得太複雜，你只需要一個言之成理嘅理由。就算你係想休息下，亦可以講下點樣利用自己嘅空白期，釐清自己嘅目標或增值自己，令自己有更好嘅發展。唔好太高估呢條問題嘅決定性，只要你表現正面，同時顯示到自己嘅能力，好多時僱主都會考慮請你的。
3. 解釋自己嘅優勢
去見工，首先要清楚自己嘅強項同優勢，然後喺面試當中盡力表現出嚟。如果有空白期，只要你將重點放喺自己嘅能力，將自己嘅優勢有效表現出嚟，顯示你可以點樣勝任呢個職位、點樣幫助到公司發展，自然可以淡化工作空白期嘅影響。
4. 未打不要先輸
首先要記住，有空白期唔等於比他人輸蝕。千祈唔好工都未見就自降身價。其實只要你嘅要求合理而且貼近市價，如果經驗適合新工作，好多公司都未必會用較低嘅人工請你。見工前自降身價，自信已經先輸一截，其實未必值得的。
以上文章刊於《招職》。
