話就話「求職」，不過見工嘅嘢係工揀人亦係人揀工，份工衰起來可以見工見到一半就想「閃」，以下三個真實經驗，唔知大家有無共鳴？

遇到煙鏟

有次見到某間保健食品公司請Marketing，就Send個CV試一試。好快就收到面試邀請，上到去先由人事部及市場部主管負責面試，完成這一關後市場部主管叫我留步，話公司總經理今朝得閒，想順便見一見我。

聽阿爺講佢後生時去見工，好多老細都係邊煲煙邊面試，甚至拎支煙叫阿爺一齊煲。想不到今時今日我見「保健食品」Marketing工都獲此「禮遇」。那位總經理是一邊煲煙一邊問我問題，更爆的是他辦公桌旁邊竟然有一個「痰罐」，他講了幾句真係吐了一口痰落痰罐度。加上他不斷提到這間公司原來有罰錢文化，遲到要罰錢、上司認為你做錯事可以扣人工，屈指一算咁樣七除八扣肯定人工仲削過現職，於是聽完煙鏟訓話後，就急急起身「閃」人了。

生意失敗格局

作為職場新手，我轉工時都係用上「漁翁撒網」策略，有時收到見工邀請，都要諗一諗才醒起係邊間公司。部門主管約我傍晚六點上去見工，上到去望一望，成個辦公室鬼影無隻，只有部門主管一人用一部Laptop睇緊YouTube。

本來以為呢度做嘢啲人係準時放工，不過再望真啲原來所有枱都未接駁電腦，換言之成個Office就只有該名主管返工。等了好一輪，終於等到老細由對面海佢自己Office趕過來負責面試，傾了一輪才知道他剛剛接手這盤生意，現在仍積極尋找新投資者注資，但佢又充滿信心這間公司可以發大來搞。更離奇的是傾傾吓佢就忽然話我要求人工無問題，並且問最快可以幾時返工。這時候我就諗起呢間公司根本係生意失敗要搵新投資者，現在格局又十足《三國演義》的空城計，真係擔心返新工連第一個月人工都能否到手，伏味濃到咁，當然係話要考慮一吓明天再搵個藉口婉拒Offer吧。

請女人又唱衰女人

自問唔係甚麼「左膠」，不過有次見一份文員工，都真係見到一半就想「閃」。負責面試的是一名師奶，佢見我朋友係後生女，就話請文員都係請女仔好，做嘢夠細心。但之後佢就問我打算幾時結婚同生仔，我話自己咁後生未諗呢啲，佢接住就一口氣數女人有個家庭好麻煩，特別係生小朋友，周不時要請假，簡直係同公司過唔去。嘩，佢自己都係女人又講呢啲，「刻薄」兩個字明顯寫在額頭上，即時反應當然係「閃」人至上啦。