阿媽嗰代最常聽到的慘況係日頭返完工廠，夜晚再踩多轉茶樓洗碗，捱到金睛火眼先幫補到家計。今時今日放工跑去「炒散」又係咪好慘？以下三個過來人經驗，應該可以扭轉你對打多份工的印象。

去旅行靠「炒散」

做兼職或Freelancer係大學生活不可或缺的部分，我亦不例外。大學二年級時經朋友介紹下，找到一份酒店餐飲部「炒散」工作。叫得「炒散」，當然係邊個位缺人就埋去「補位」。所以我做得最多係宴會廳侍應，仲有自助餐負責洗洗切切的「小廚師」。

唔少人話酒店「炒散」工最慘係遇到衰工頭，經常被人呼呼喝喝，有鑊就一定推比「炒散」工。幸好我一直跟到個好工頭，佢對「炒散」工同其他下屬一視同仁，而且透過呢份工，我學會了執生，仲有自助餐邊啲嘢先抵食。更重要係當年拍拖使費都係靠呢份「炒散」。畢業後我放工或放假時都會繼續做呢份「炒散」，一來工頭會優先搵熟手，二來密密做「炒散」，收入夠我每年去兩次日本滑雪，又點會慘呢？

養車不如「炒散」

我對揸車都頗有天份，學車學兩堂就基本上手，考貨Van牌亦一Take搞掂。但香港養架車每個月單係泊車都三、四千，加埋牌費、保養，對我每月賺萬幾的打工仔真係好吃力。

但任由個牌急凍，手車一定會生疏，出門旅行想自駕就牙煙。於是我諗到一個好方法，就係做「炒散」貨Van司機。我通常只在平日及放假租車接柯打，因為路面較返工繁忙時間少車，而且較少緊急柯打，個客都唔會係咁催你，更會同你吹下水。這份「炒散」工既可以賺外快，又可以揸車減壓，瞓少幾粒鐘都唔覺得慘。

我「炒散」 因為我失眠

每月交七千蚊租，都係想有個地方瞓個好覺。我都係咁諗，但偏偏我係長年失眠。有一晚喺牀眼光光，突然諗：既然都瞓唔著，倒不如撈多份「炒散」。

於是我喺屋企附近搵咗一份外賣速遞「炒散」，除咗多一份外快幫補租金。因為成晚四圍跑，回到家我竟然瞓到三、四粒鐘，這個意外收穫對我來講，回報肯定遠勝送外賣的「炒散」收入了。