最近睇咗本書，真係唔分享下唔舒服。呢本書唔係咩新書，2002年初版，即係已經係16年前嘅書籍，恕小弟才疏學淺，直至最近先拜讀，真係獲益良多。

呢本書中文叫《這是你的船 — 成功領導技巧和實踐》。你睇個書名好似好鬼悶，其實我初初都係咁諗，但係如果你對領導呢方面有興趣、或者好想知點解你老細做唔到領袖，睇睇下你就會停唔到落嚟。

介紹返，作者係美國海軍軍艦班福特艦嘅前艦長Michael Abrashoff。呢本書係講佢如何透過出色嘅領導技巧，將原本士氣低沉嘅福特艦，改變成當時美國最出色嘅軍艦。佢認為佢喺軍艦嘅領導技巧可以應用喺公司入面，所以離開軍艦後就寫咗呢本書。

書入面講咗好多領袖嘅特質，一篇文章篇幅有限，喺度分享其中比較印象深刻嘅幾點，或者你可以睇下自己或者你老細有冇。

1.問題通常出喺自己身上

作者講到，如果發現下屬表現不似預期，佢會問自己三個問題。( 1 ) 我有冇明確告知下屬我嘅目標？( 2 ) 我比嘅資源同時間係咪足夠？( 3 ) 我有冇比足夠訓練佢地？然後經過統計，佢發現90%問題都係出於自己身上。好多上司發現下屬出錯都會怪責下屬，但到底責任係咪全部都出於下屬呢？

2.積極聆聽

作者接任做艦長之後，發現船員都非常聰明，只係冇一個願意用心聆聽嘅艦長聽佢地意見。於是佢要求自己積極聽下屬嘅意見，然後從中搵出最好嘅諗法。好多人以為自己做老細就係負責發號施令，但係最好嘅解決辦法，往往可能嚟自下屬嘅意見。

3.信任你嘅下屬

作者身處海軍，階級意識非常重，但係佢用人嘅時候並唔一定論資排輩。當佢委任一啲年資較淺嘅下屬負責重要崗位，佢地通常都會全力以赴，而且表現會令人眼前一亮。試想下，做細嘅你想老細信任你，定係乜嘢都唔比你做？識揀嘅，梗係揀個肯信任你嘅上司。

而家90後、千禧後都進入職場，呢個時代正正需要更多開明嘅主管。近近地喺香港，如果你睇過前一田CEO莊偉忠先生嘅《不開會的CEO》，你一樣會睇到重視下屬嘅管理風格。

如果你今日已經係一Team之主甚至係公司領導人物，呢本書會令你更了解點樣先可以令員工做得更好。如果你今日做細嘅就更加應該睇，因為你會更清楚點樣先為之一個好領袖，亦可以從唔同角度睇自己老細嘅決定。將來有朝一日你要做人大佬，呢本書一定會幫到你。