搵工要份好CV，呢一點相信大部分人都知。但偏偏平時收到嘅CV當中，有唔少都寫得比較「奇形怪狀」，有啲寫多咗唔應該寫嘅嘢，有啲又會寫漏好重要嘅嘢。咁到底一份好CV應該有啲咩？

1. 基本個人資料

個人資料當然必須有你嘅姓名、聯絡電話、電郵地址等。姓名可以係全名、亦可以包括英文名，電郵地址要係「正常」嘅，bbpig@xx.com嗰啲唔該收返埋先。

有啲人喺呢部分會寫多咗，包括詳細地址、出生日期、性別、宗教信仰、婚姻狀況、係咪黨員（至少香港、外國公司唔駛），呢啲都唔係必要性資料。如果你覺得住得近公司係一個優勢，寫住邊區已經足夠，因為HR係唔會上門探望你。

2. 事業目標

喺CV開頭嘅部分可以加份簡短嘅事業目標，4至5行已經足夠。寫工作目標最緊要貼地，係一啲可以達成嘅目標。例如如果你係個薯仔，唔好寫話下年我要坐你CEO個位，咁樣就好似有啲不切實際。

3. 學歷

對於一個Fresh Grad.嚟講，可以先寫學歷、後寫工作經驗。但如果你已經做咗好幾年嘢，就應該將重點放喺工作經驗，後寫學歷。有啲人寫學歷會寫到去幼稚園，其實去到中學，對一般工作嚟講已經足夠。另外，我見過有部份人會列曬自己每一科嘅成績，其實除非成績同申請職位好相關，你係可以選擇唔寫落去。

4. 工作經驗 

基本上做過嘅每份工作都應該提及，避免出現空窗期。如果你做嘅工作數量比較多，建議可以寫埋離職原因，特別係合約完結或公司裁員，以免HR誤會你jumpy。

介紹工作經驗時建議最好用點列，簡而精咁列出工作內容及成就，切忌長篇大論。另外，就住你申請嘅職位，你可以簡化一啲唔太相關嘅工作經驗，將重點擺喺相關嘅經驗上面。

5. 薪金

除非你申請政府工、或者你申請職位已經有一個公開嘅固定薪金，否則你應該要寫你嘅現職及上一份工嘅薪酬同埋要求薪金。呢點對公司嚟講係一個重要嘅參考，如果明知大家夾唔到，咁就無謂浪費大家時間。寫要求薪金要夠實際，清楚了解市場嘅薪酬趨勢，獅子開大口嘅話，份CV幾靚仔都冇用。

6. 可到職日期

唔好睇少呢一點，到職日期隨時可以係有冇機會見工嘅關鍵。當中最殺食當然係可以即時到職，如果要通知期，就應該喺CV上面清楚寫明。千祈唔好為咗爭取多啲見工機會而亂寫，如果到時你真係唔可以到職，隨時offer都唔畀你。

7. 專業資格及技能

如果你有考取專業資格當然要寫落去，但如果你嘅專業資格已經過咗期，咁你就唔應該再寫落去。另外，認識多種語言都係一個優勢，清楚寫明你每種語言嘅熟練程度會更好。

8. 嗜好及課外活動 

呢一點你可以就著你申請嘅職位選擇寫或唔寫，如果申請嘅職位係同嗜好有關，寫落去係會有幫助。寫嘅時候都要留意返篇幅，因為呢樣未必係CV嘅重點，一個list大半版紙就會變咗喧賓奪主。