出嚟做嘢，總有機會要同唔熟嘅同事一齊食飯，最怕空氣突然安靜，唔想Dead Air 無嘢講咁尷尬，又唔想一開口就講錯嘢，真係要袋定幾個Topic 喺袋，隨時準備同其他同事Social。

1. 社會熱話 (Hot Topic)

遇到無嘢講嘅時候，不妨睇吓有無咩Hot Topic可以講。記得要搵啲輕鬆嘅Topic 去傾，例如﹕名人嘅花邊新聞、某KOL出咗熱門嘅影片、某明星就開show或有新電影等，用娛樂新聞帶起話題。不過要留意呢啲話題唔好同政治、宗教等嚴肅話題有關，如果唔係就好易由閒聊變成爭拗喇！

2. 放假活動

問吓同事放假有咩活動，了解吓佢平時有咩喜好活動，可能搵到你哋共同興趣，都係一個打開話題嘅方法。如果同事偏好靜態活動，可以同佢傾吓Netflix 有咩新劇好追、有咩新上電影好睇；如果同事鍾意戶外活動，就可以講吓去邊行山好、邊度風景靚，投其所好，打開話題。

3. 飲食推介

飲飲食食係一個好好嘅Topic展開話題。唔知同事鍾意食咩，可以考慮由公司附近餐廳入手，有咩好食餐廳推介、有咩新餐廳想試或者有無咩慳錢或排隊攻略，大家都係同一個地方返工，一定好易有共嗚，仲好易引起大家嘅興趣。

4. 旅遊

香港人就最鍾意去旅行，傾旅行經就一定唔會出事。講吓幾時有平機票搶、下次旅行Plan 去邊、有咩必買必食，分享吓大家嘅旅行經歷，互相推介必去或想去嘅景點，輕輕鬆鬆就可以同唔熟嘅同事打好關係。

5. 寵物
                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                              
如果你哋當中有人養寵物，傾吓毛孩都係一個打破Dead Air 嘅好方法，分享下養寵物嘅趣事。如果對方有興趣，仲可以Share 一啲寵物嘅得意相俾對方睇，用得意嘅毛孩打破尷尬啦！