喺香港地，唔使OT就好似愛麗斯夢遊仙境嘅仙境一樣咁夢幻。但事實係身邊總有幾個朋友係實實在在咁活喺仙境當中，你望住佢地除咗食葡萄之外都冇咩好做。

不過，唔係每個唔使OT嘅人都識得好好善用唔使OT嘅時間。我有個朋友，以前份工晚晚要OT，之後轉咗份新工日日都準時收工。新公司嘅文化係5:30執嘢，6:00準時走人，自此之後佢每日收工都去吃喝玩樂，攪到自己變埋月光族。

如果識用，呢啲空閒時間其實可以好好用。點樣運用仙境入面嘅時間，隨時就係你比其他人成功嘅關鍵。

1. 培養興趣

好多成功人士都話，唔好為工作而工作，要為熱情而工作。但係打工仔就話，我都唔知熱情喺邊，咁又要食飯喎，唔通唔做咩？事實喺現實世界唔係個個都可以咁易搵到自己嘅熱情所在，而且大部分人都會放棄去搵。如果你有機會進入仙境，不妨花多啲時間去思考呢個問題，或者嘗試花時間培養自己嘅興趣。例如，我有個朋友本身好鍾意插花同埋做手藝，佢放工就去學插花，星期六日又會整吓小手作，期望有一日可以發展另一項事業。夢想嘅嘢要花時間經營，趁自己得閒，花多啲時間落去相信總有一日會有成果的。

2. 發展副業

好多香港人都會嘗試喺公餘時間做副業賺吓外快。有人會攪下網購、有人可能會租幾個格仔開格仔舖、有人會畫下畫擺上網比人欣賞。千祈唔好睇少副業嘅重要性，作家及演說家Tom Corley走訪咗好多成功人士了解佢地嘅生活習慣，發現成功人士每日最少都會花60分鐘喺有助發展自己夢想嘅事情上面，例如係佢地嘅副業。香港人創辦嘅社交網站9GAG，一開始都係以副業嘅形式經營，佢地而家Facebook已經有超過4千萬讚好。成功唔一定只有正職一條路，識得好好利用時間，副業嘅發展空間反而可能更大。

3. 學新嘢

係好老土，不過又係事實，學習對自己永遠都有益。不過，咁多嘢學，唔係樣樣都啱自己學，而且對於我地呢啲凡人嚟講，時間同金錢都係有限的。同樣都係嚟自Tom Corley嘅研究，成功人士平均每日最少花一個鐘去自我增值，學幫助到自己事業嘅技能。從呢個方向細心選擇，學到嘅嘢就一定唔會浪費。