制度
大公司由於員工多，業務又多，當然要定立好多制度去幫手管理，以免搞到公司好混亂。但制度多真係有好有唔好，好嘅就係做乜都有晒指引，冇咁易撞板；唔好就係遇到緊急情況，都冇得彈性處理！相反，Startup業務比較少，做嘢就會相對自由，好多時老細都會容許員工彈性處理唔同業務，但弊處就係啲嘢好亂，乜都要自己搞返好！

人工
大公司加人工通常都會就住就住，特別係上市公司，仲要對得住股東。每年基本上都加一千幾百，唔會有咩大增長。不過，如果係初創公司，公司好多時為咗留住人才都願意加多少少人工加幅，因為冇咗
一個好員工對Startup影響係好大！

同事關係
大公司每個員工嘅崗位都好清楚，大家各自為政，相對冇咁多接觸。雖然關係冇咁密切，但少接觸都減少工作上嘅衝突。而Startup好多時工作性質分得冇咁仔細，好多嘢都要同同事夾，要一齊傾，有機會增加磨擦！但如果你同同事好夾得埋，就會變成「拍住上」，唔單止係同事關係，仲會做到好朋友！

晉升機會
大公司職位等級分得好清楚，亦好明確睇到晉升前景，但通常做得大公司嘅中層或者高層都冇咁易走，有機會長期俾人霸住而升唔到職。相反，細公司冇咁多職位，升職都可能只係升到一級，但會相對容易晉升，因為老細好明確知道你做唔做到嘢！

滿足度
大公司一般都係收老細Order就做嘢，發揮空間唔會好大。但就會多啲同事分擔工作，做得輕鬆啲！而Startup做Project都要由零開始，由諗橋、買物資、Book場，落場……全部都係幾個同事做晒，做咩都要親力親為。辛苦就一定架啦，但係做得成功嘅話，呢份滿足感係大公司體驗唔到！

無論做咩公司都好，最緊要可以發揮你自己嘅實力，千萬唔好貪多少少人工而令自己Career path停滯不前呀！