有啲公司每當有資深員工離職，為咗節省成本，都會選擇請Fresh Grad.頂替。不過今時今日呢支歌仔愈嚟愈難唱，皆因好多Fresh Grad.畢業都未必即時投入事業，可能會去下Working holiday或考慮做Slash。

愈嚟愈多年輕人選擇做Slash，呢個名詞亦愈嚟愈響。Slash呢個字係嚟自《紐約時報》專欄作家Marci Alboher出版嘅《One Person/Multiple Careers: a new model for work/life success》，因為好多年輕人都身兼多職，喺自我介紹中經常會用符號Slash「/」嚟表達自己嘅多重職業身份，例如：凌凌七 / 豬肉佬 / 特務 / 間諜。從此呢個世界都用Slash，中譯「斜槓青年」嚟形容身兼多職唔打長工嘅年輕人。

而家嘅時代唔同咗，因為經濟負擔冇咁重，好多年輕人唔想被一份工縛死；比起穩定收入，更嚮往自由嘅工作時間。Slash嘅其中一種定義就係同時打好多份Part-time或者Freelance job，簡單啲嚟講就係傳統嘅炒散。呢種工作模式可以帶嚟半自由嘅工作時間，但就冇一份穩定嘅職業路徑，所以有啲人就會覺得Slash就等於冇目標嘅廢青。

不過，Slash其實唔係咩新嘢，以前霑叔黃霑就係填詞人 / 作典家 / 導演 / 演員。千祈唔好睇少Slash，你只要去Google打「Slash創業」、「Slash成功」呢啲字去Search下，你會發現有好多成功例子，有畫插畫嘅、有唱歌嘅、有攪Event嘅、有賣衫嘅等，由Slash開始變成一個公司嘅老細，更加創業成功。

一部分人做Slash可以好成功，一部分人做Slash就停留喺搵緊下一份工，好大分野在於有夢想同冇夢想嘅分別。做Slash唔使被一份工縛死，可以有更多工作選擇權利，而且仲有機會比你做到自己喜歡做嘅事。所以如果選擇做Slash，一定要把握機會做自己想做嘅事。如果一味只係為咗享受彈性工作時間而做Slash，而冇將重點放喺自己喜歡做嘅事情上，結果只會係不停炒散，輪迴地獄又折返。最後可能要返去打長工，而且仲可能因為工作經驗太零碎而不被公司看作「年資」而要再從低做起。