每逢新年大家可能都好怕親戚問「幾時帶男/女朋友比我地見下？」「幾時結婚呀？」「幾時生仔呀？」等令人尷尬既問題，不過我就無咁既煩惱，點解？因為大部份每年見一次既親戚都會問：「亞飛，仲係唔係做緊呢份工呀？下，又轉左啦？」

投身社會十二年，轉左十一份工，除左親戚朋友外，有試過連日見夜見既亞媽都會唔知我做緊乜。
 
「亞飛，近排夜左返屋企食飯既？」「亞媽，轉左工。」「下，轉左工三個月咋喎，又轉？」唏，就係趁未過試用期就逃離地獄嘛。

對於不斷轉工，有人關心我，有人笑我，有人不斷講道理去感化我；亞媽亞爸覺得我仲係貪玩唔定性，咁轉工法邊可能有成就；另一半又會無安全感，點同你計劃將來？但呢十二年間，我越轉越高職位，大家又覺得不可思議。

其實，custom made CV 同 cover letter好辛苦架，interview比人問到口啞啞又好過癮咩…我都唔想不斷轉工同轉行，真係好攰…

但點解又要轉工？

頭一兩年人工低，屋企又咁辛苦供書教學，真係好難家用比少少，講理想講career path。

之後，工作環境亦令人好頭痛，我試過自己住柴灣公司搬左去荃灣；同事話我二五仔；又試過老細無情白事日日粗口問候你。

到環境稱心人工滿意，準備全力以赴既時候，竟然比我知道，原來公司既架構係無位再升你職之餘，你對上既老細應該一世都唔會走…

咁樣你叫我點可以唔走？
 
有時真係覺得好運滯，但好彩及早了解自己既能力同志向，令呢條職場路雖錯綜複雜但不致迷失。
 
唔了解自己究竟有幾大問題？
 
記得投身社會之初，人工唔理想，升職又遙遙無期，我見朋友做緊採購呢行，人工唔錯，入行一年又已經升左職，睇落幾好，所以明知機會好微，一個technical人都膽粗粗send信轉行搵採購工。
 
好好彩，終於有一間肯見我，我當然同朋友取晒經信心十足咁去面試，點知一坐低，位Manager問我點解想轉行，係唔係technical唔適合你，我唔識答；咁佢再問我點解採購適合你，我又唔識答；佢再問我究竟知唔知自己想做咩，我口啞啞，除左人工，我完全唔知自己想點，結果佢同下屬講左句”就係呢類人浪費大家時間"就起身走左，當場無地自容。

但我好感激佢，因為呢件事令我明白到，如果唔知自己想點，就算準備幾好或有人比機會你，你都一定把握唔到。

所以之後，雖然職場生涯好jumpy，但每一份工，我都會問究竟適唔適合自己，唔適合就轉；到適合，又會問自己點樣可以將呢份工既經驗同自己融合，去蕪存菁；就係咁，越搵到適合自己既工，吸收更多相關經驗，就令自己越進步。

直到上一次見工，一間大型企業，同時面對Head of HR，Department Director 同 Head of Department，依舊毫無懼色，刁鑽問題亦能對答如流，再加上將自己既經驗融入企業環境之內，分析行業走勢同前景，相信令三位考官也對這位jumpy男生另眼相看。

咁都算係一種進步卦？

呢條曲折離奇既職場路，充滿際遇，運數，真係比多十次機會我都無辦法複製多一次，不過就算好多野控制唔到，最少都要了解自己，因為我相信可以清楚自己既話，條路總不會太差。

在此多謝及早點醒我既人（包括令我無地自容既manager），無你地我無今日。

除左見工，職場仲有好多新奇趣怪事！等下次同大家分享下6點前職場險象環生，6點後同考官廝殺既驚險故事啦！