近日喺討論區有網民分享自己做多日就Last day，但上司突然同佢講無收過封辭職信，如果要走需要兩個月通知期，令網民失晒預算。後來得知，呢位網民只係單純將封辭職信擺喺上司枱面，亦無send email通知同留底，認真失策！
打工仔搵到新工固然開心，等咗咁耐終於可以脫離地獄，但係今日唔知聽日事，保障自己辭到職又好，保住條後路可以食回頭草都好，點樣辭職同公司上司同事保持良好關係都係非常重要，呢5件事一定要做到足！
第一件事：通知上司：「我唔做喇。」
今時今日工作上用WhatsApp / Signal溝通係好普遍嘅一件事，但如果要講辭職，最好都係面對面講，約定上司一個時間用嚟講呢件事，有幾點要注意：
- 預備定辭職信：
寫明離職日期，同時係一個正式通知。 - 準備定得體答案：
上司可能會問好多問題，例如：「點解要走？」「公司對你唔好咩？」「係咪有咩唔滿意？」之類，呢個時候唔使太詳細回答，「官腔」啲都可以，有咩「建議」（a.k.a 不滿）喺Exit interview再講都未遲。 - 無辦法Face to face講點算：
折衷嘅方法就係視像會議 / 電話會議。至於email就唔太恰當亦無咩禮貌，但之後用嚟確定辭職，畀HR記錄就無問題。 - 辭職消息邊個發放：
問下上司，自己辭職呢個消息由佢同同事講，定你自己講，上司可能有唔同嘅考慮，可以交由佢決定。
第二件事：有Counter offer點處理
好多公司都傾向「做生不如做熟」，請個新人返嚟重新夾過係唔易，所以辭職嘅你收到counter offer係好正常，通常都係加人工，加福利，升職，或者內部調職。雖然有counter offer係被認同嘅一種，值得開心，但打工仔要問下自己幾個問題：
- 當初點解想轉工？
- 令你轉工嘅問題有無因為有counter offer而解決咗？
- 如果你唔嗌辭職，公司會唔會升職加薪？
- 唔轉工嘅career path好啲，定轉工嘅career path好啲？
- 接受counter offer之後，你同上司嘅關係會唔會有轉變？
如果最後你決定留低，確保呢個offer會black and white定明幾時生效，簽名作實。
第三件事：喺最後嘅日子做好Handover
如果你最後決定離開，通常上司就會同你夾離職日期，一般公司就一個月，經理級可能去到兩個月，如果有年假未放，又會唔同，呢個需要大家有共識，等公司有概念幾時可以請到人接手，又或者可以搵住邊一個同事take up啲工作先。你可以：
- 問下上司你手頭上嘅工作由邊一個接手，同Team同事？等新人返工再處理？
- 確定有咩Project係比較趕急，同上司夾返由你喺通知期內完成，定同同事一齊完成等遲啲有人follow-up。
- 準備一份詳細嘅Handover list，等其他人有一個清晰嘅圖畫知道自己要做啲咩，唔使搵嚟搵去。
- 如果已經搵到接手嘅同事，可以draft一個email畀內部同事同公司外嘅合作夥伴，好好介紹一下。
- 有需要嘅話，可以同上司一齊會見求職者，用你嘅角度去觀察邊一啲技能同經驗係需要嘅。
第四件事：保持聯絡
唔做同事，第日都可以做生意夥伴，又或者第時再次轉工見返舊同事都未定，世界好細。所以，喺Last day嘅時候，可以send一封email寫明聯絡方式，電郵地址、Linkedin都可以，至於Facebook同Instagram呢啲比較個人就自己衡量。
聯絡還聯絡，問起點解辭職呢啲問題，盡量避免講舊公司壞話，唔好嘅事有時都唔需要你講，大家都明⋯⋯ 另外，新東家係邊一個都可以選擇作答，如果係同行競爭對手，講太多反而影響你自己。
第五件事：準備好心情返新工
喺通知期未完，又未返新工中間一段時間，可以做定功課拎印象分：
- 喺Linkedin follow下新公司、新老細、新上司，睇下有咩新動向。
- 聯絡你嘅新直屬上司，睇下on board之前有咩可以預備定。
- 可能你喺會試嘅時間已經知道自己有咩工作，可以做定啲research，準備下。
- 規劃下返工嘅路線，等你唔使遲到
由頭到尾跟足做一次，辭職又舒適啲，新同事接手又開心啲，等返新工壓力又細啲，一舉三得呀！
