老闆之所以為老闆，理所當然擁有公司事務的最終裁決權。哪怕，這個最終決定，是多麼的荒謬、反智、愚笨、不可思議、注定撼頭埋牆亦一樣；聖旨一到，下屬便要俯首執行。

遇到這種狀況，打工仔有兩個選擇：

(1) 奉迎佢英明神武，心底祈願腦細的「天才」決策不會跌落坑渠，大步檻過。

(2) 苦苦相勸，用閣下的「錢途」搏一舖……

萬一事情的發展如你所料，器量大的老闆或會對你另眼相看；但小心，小器的腦細極有可能惱羞成怒，拿你來出氣，狠插怒罵：

「你咁叻，當初又唔講？公司請你返嚟翹埋對手睇戲食花生㗎，天才！」( 真實對白 )

閣下心中一萬個不服氣，明明事前同佢講咗一萬次，腦細現在厚顏唔認聽過，你吹佢脹？

當然，古代的大臣還有一招，叫「死諫」，套落現今職場環境，等同打工仔用辭職來鬥氣，威脅腦細收回成命。如果你細個上中史堂無瞓着，應該知道這招的成功率無限地迫近零。你不會這麼戇居用大拿拿月薪來以死相勸啩？

記住，受人錢財，賣力就夠，唔使「賣命」嘅。雖然你和腦細搭埋同一條船，唔想睇住公司變成鐵達尼，撞落冰山攬炒。但是，你總唔使船都未沉，自己不顧一切先跳落海嘛。儍豬豬嚟嘅。

不過，如果碰巧事前有其他船經過，對方船長仲向你招手呢？咁就自己醒水啦。唔想做逃兵反骨仔？咩年代呀巴絲打？