上司，或頂頭上司，有時我地會稱呼佢做老細。呢啲俗稱，同大陸逢人叫「乜總」一樣，是約定俗成的誇張失實，冇謂太執著。

但切記這種老細和「真正的老闆」本質上有好大分別，呢一點，打工仔要牢牢記住。

「真正的老闆」，如果係大公司的老細，雖然佢掌握生殺大權，但實際上佢同總統呀如來佛祖呀之類無分別，基本上唔得閒理你，除非你係打工皇帝級。所以，你平時都唔使點理佢。

如果係中小企老闆，咁就唔同，他可能坐在隔籬房，日日篤住你做嘢，心情唔靚隨時可拿你開刀，炒人連會也不用開。

但無論老闆幾衰都好，大老闆是不會搞辦公室政治的。儍的嗎，公司根本是他的，搞來為乜呢。

上司不一樣。上司，視乎職級，某程度亦操控下屬生殺大權，雖然他本身都「只不過」係一件打工仔。上司麻煩過「真正的老闆」的是，他們會「弄權」。

上司最最最鍾意搞辦公室政治。第一，他要立威，方便Head住你Order你。第二，他要防止下屬叻過佢，亦即「忌才」。

上司更有可能跣你。情況有兩種，一種是被動的，跣你是為了卸鑊；另一種是主動的，打壓讓你在公司裏無運行。

有人以為：咪咁陰謀論啦，個個都衰人，唔通個個上司都想做衰人咩！

少年你太年輕了。在今時今日的職場生態，那種默默耕耘不求有功但求無過的小薯，如何能躋身管理層？肚裏沒一點心計，當初又怎會「上位」，成為你的「老細」？

所以，上司的本質，和童話裏央求青蛙揹過河的蠍子一樣：去到河中間，他必然忍不住用毒針刺你。沒法子，天性來的！

以上文章刊於《招職》。