( 上回提到：Stella在地鐵站遇到失明人士，主動上前提供協助。)

「你屋企人定朋友，都係有我地呢種障礙？」女士笑著向Stella問道，語氣中流露著一份自信。

「無呀！點解妳咁問嘅？其實 ⋯⋯ 都唔係乜嘢障礙啊，只係 ⋯⋯」聽到「障礙」一詞，Stella不自覺地希望向對方表達一種正面的安慰，但嘴巴不懂怎樣說。

「哈哈，睇唔到，仲唔係障礙？我地直頭係傷殘人士啦，哈哈哈，你唔使咁介懷架！」女士感覺到Stella尷尬的心情，用手輕搭著她的手臂，反過來作安慰。

「唔好意思啊，我 ⋯⋯ 無乜特別意思。」

「我明白。唔緊要，喺好多人眼中，看不到，確實係一種障礙，亦會有一份憐憫嘅心。關鍵係，我地用乜嘢心態去面對！放心，我好接受自己嘅缺陷，我視作為生活既學習。」失明女士彷彿看透Stella的內心，真誠地分享自己的感受。

心同此理  從心出發

「對我都係一種學習啊！曾經為盲人組織做義工，當導賞員，所以知道盲人嘅需要，就好似點樣用手臂去做帶領。」Stella聽到女士不修飾的分享，自己內心也敞開了。

「你帶得好好啊，令我覺得好放心！我叫Ruby呀，多謝你，Stella！」不經不覺，大家已經踏上扶手電梯。

「睇唔到嘢既生活，唔知係點既呢？」Stella喃喃自語地說著。

「更心用去生活。」

「更用心？」Stella沒意會到自己的絲絲細語，竟然也被Ruby聽見了。

「係呀！Stella，你有見過行路好急嘅失明人士嗎？」Ruby臉帶微笑問道。

「當然無呀，你地每一步都係小心翼翼的。」

「能夠用眼睛走路嘅人，即會橫衝直撞。好諷刺，係嗎？」

「係呀，依家大家嘅眼睛都放咗喺手機上面，步伐亦非常急促。雙眼清明，但係內心好躁動。」

「所以，當我地睇唔到，返而會更心用去生活；會更有耐性，其他嘅觸覺亦會更靈敏。Stella，你都係一個用心生活嘅人呢！」

「多謝你呀，Ruby。我都仍然係學習當中。」 ( 待續 )

以上文章刊於《招職》。