難得請到長假期去個短途Trip，一心只係想咩都唔理，舒舒服服享受下私人時光。

不過呢，總係會有啲不識趣嘅同事去「關心」你去邊度旅行，託你順便幫佢地入下貨。當然唔好咁傻瓜咩都應承晒佢地做壞規矩，買三幾樣得體嘅手信返嚟應酬佢地就可以啦。唔好睇少一班師奶仔同事，佢地絕對係旅遊達人，老闆唔喺位嘅話，就會密密上網睇定旅遊資訊，幫一家大小安排又抵又好玩嘅行程。所以，你請食咩手信佢地一定全部知價，如果係平價貨小心暗地裡被人唱你吝嗇，分分鐘背後要承受一大堆閒言閒語，有排你受。

有位平時唔聲唔聲嘅男同事就係為咗免卻麻煩，煞有介事申明自己只係返大陸玩幾日，又或者留喺香港攤抖下，點都唔係出國咁話！大家最初都覺得佢有啲奇怪，可能只係唔想我地煩佢。點知喺佢放大假第二日，大家Lunch時無聊睇面書，就見到佢被女朋友Tag咗張喺九洲影嘅合照，仲笑得非常燦爛！「原來阿文識笑架！即刻陽光好多！幾好睇！」大家嘅第一反應竟然唔係責怪佢呃我地，係真正關心呢位小伙子，始終佢仲係入世未深吧！

睇得一張旅行照邊可能滿足到我地，索性Click入去佢面書睇啦。咦？連頭先個張合照都無埋嘅？睇嚟佢應該醒水快快手Delete咗。我地靜靜互相對望，大家都心照呢件事唔好喺阿文面前提起。

到阿文返到嚟，大家啲行為和說話都怪裡怪氣，我估阿文都好懷疑究竟我地有無睇到啲相，比平日更害羞，好似做錯事嘅小朋友唔敢再講再問。去得咁鬼祟又咁驚青，好無謂。開心Share下旅行趣事和得意手信，係一個好機會拉近大家嘅關係，最後都係方便自己工作，唔好諗住晒錢晒時間去付出少少就實係自己蝕底，蝕底就咩都唔願意做。

由一踏入職場開始，係唔可能放工後完全無視公司嘅人同事 ，除非你無諗過要長做或喺同一間公司升職，否則佢地嘅目光及對你嘅印象都係你向上流嘅踏腳石，咁你都要識趣，去旅行都要記掛埋佢地一份啦！

圖：Shutterstock

以上文章刊於《招職》。