每年一到聖誕節，總會發現某某經理請食下午茶，某某Team head送小禮物，某某同事懶有心意投其所好，挑選卡通人物嘅精品送比相熟嘅戰友。我……作為一粒小薯仔，無理由坐定定喺位攤大手板等收禮物咁失禮嘅，不過送啲咩及揀咩人嚟送要攝高枕頭諗清楚，唔覺意得罪人你新一年都唔使旨意好過。

本來人人有份就最穩陣啦，之不過公營機構啲部門充斥咁多「精英」，閒閒地都二、三十人，邊有可能個個送一式一樣嘅野，你估派利是咩？首先你要Target送比邊班人。講緊嘅並非親密戰友，幾個女仔圍威喂交換禮物自己玩太小圈子，要送就送埋比工作上有合作關係嘅老闆和同事。嗱，自己條Team唔使講一定走唔甩架啦，而老闆們呢？就好考你平日嘅觀察力，加埋你同佢嘅關係去到咩程度。如果太不自量力，人地連叫你個名都好勉強，就唔好太醜怪擺明奉承去送禮，行過見到擠出笑容講句「聖誕快樂」更輕鬆自然！

Set好咗目標，最最頭痕就係諗送啲咩，開始要Plan禮物推薦List！老闆們嘅反而最易解決，最簡單就係去名牌子嘅舖頭買盒聖誕版嘅朱古力或者曲奇，貼返張可愛Memo紙喺包裝上面寫返你個大名，唔寒酸又實用，搞掂！而同部門嘅同事都會分有兩句吹吓或Hi bye友。Hi bye友使咩送，除非對方咁有你心預埋你一份，你先要禮貌上做返回禮，否則可以慳返啲腦力喺佢地身上。

吹得兩句嘅小心佢係老闆身旁嘅八卦天文台，送唔送就睇你想同佢地嘅關係點樣發展落去啦！天文台當然有佢嘅存有價值，討好佢地似乎比較著數，就算唔喺佢地身上套到料，起碼唔會被佢地咁易向你送上幾枝暗箭。而家咪好興做小手作，獨一無二又充滿心意。如果被天文台妹妹搜尋到有人有呢啲特別才能，製成品都見得人嘅話，你就遭殃啦！就係試過有同事中招，去咗學十字繡，喺聖誕前夕用心繡咗好幾幅靚靚聖誕畫比親密戰友，大家當然拍爛手掌圍晒嚟黎影相！天文台妹妹見自己無份，嗲聲嗲氣要求要一幅後，就醒目地即時匯報咗比老闆知，順便令老闆以為自己同同事關係融合到為佢送禮。事後同事已經後悔莫及，皆因老闆盡用員工嘅才能，呢啲作品大方得體又可以長擺真係啱晒，以後有咩同事退休、生日或者特別活動慶祝，一定點名搵你「出力」。最緊要係咩？係唔使比錢！

咁好啦，唔選擇手作，唯有比錢買，而家網上經常有唔知十大定二十大嘅「最討厭聖誕禮物」，請貼近行情唔好求其買咗就算。其實咩禮物唔太重要，係睇你有無諗過點去包裝成件事，就算普通一盒朱古力，都可以比你講到有幾咁啱嗜甜嘅佢而專登買比佢，驚唔夠可以搭張手寫聖誕卡或者黐啲得意貼紙懶係人性化啲，比人感覺你唔係交行貨就過到關！用自己荷包使錢除咗顧及對方感受，要識得用把嘴去包裝份禮物講明你嘅心思，仲要擔驚受怕人地唔鍾意唱通街，又考慮會唔會比人乘機利用你去搞事。你話比我知啦，點解明明係大時大節想開心Share，但係會搞到難過揀另一半先得架？

以上文章刊於《招職》。