逢星期一，魔鬼教練一早坐定定喺Office，邊個烏眉瞌睡返到嚟佢都一定會大大聲打招呼。你唔應佢呢，佢就響你全朵話你無禮貌，目的都係想叫醒你。邊個咁把炮？當然係王親國戚。不過呢位哥仔就係唔想被人話佢呢個空降Training manager靠父蔭先有一官半職做，所以佢決定要落力喚醒大家工作嘅心。

教練形容HR喺公司嘅Role如同燈神，喺各部門出聲前，就已經做好晒Research發掘到咩Policy咩請人條件咩Training最啱大家，令人完全感受到HR存在嘅震撼力。「阿明，出街果個招聘廣告我批咗你個報價，快手Send個貓比隔離Team，趕埋喺今個星期六出啦！如果出唔切你自己同部門解釋啊，仲有，提咗你，收到Request要兩日內比到個Draft我，點解又遲咗？唉啊，睇嚟有個Checklist跟住做，剔剔下會入腦啲！咁阿明你幫手問大家意見，設計個Checklist下星期比我。係啊，係你做，鬼叫你無特別原因又遲交功課。」阿明以往都係人急佢唔急嘅作風，但魔鬼教練係唔容許有呢啲Hea位，有番Checklist大家依賴下，又可減少Input錯誤，長遠絕對係好事嚟嘅。佢亦一直主張早啲收CV返來做野盡量減低部門真空期，等人地快啲有人用。而背後最緊要係我地HR fill vacancy條數又好睇啲。

「珍姐，聽日Deadline啦，記得上次講咗個Training aim要執，個Powerpoint一定要聽朝比到我啊！唔想重做嘅話就比定多啲Reference，而家做多少少遲啲唔使翻手做。」一聽珍姐個名就知係有番咁上下年資，想叫得郁佢做野係要有啲誘因。教練就住呢班老海鮮就推行咗個先到先得嘅準時早收工制度，只要你趕得晒手頭上嘅急野，比教練過目見到唔係求其交貨，就可以早走返屋企同粒孫天倫樂或者趁街市未收檔買定餸。有得早走對一班老海鮮簡直係福音，不過就有特定Quota嘅，大家比啲心機爭啦！

無可置疑，魔鬼教練係重新帶比好多同事一種工作上嘅新衝擊。唔係無理由咁不斷Push你，目的呼之欲出係想做到Win win，你需要份糧嘅同時我亦需要工作上嘅成效。一開始有為數不少嘅同事當佢係傻佬一名，朝朝被佢嘈之巴閉搞到成個人醒晒，做野又急死人咁款，睬佢做咩啊？漸漸大家習慣咗，適應咗，發現有股熱能喺佢地身體裡滾動，準確無誤快手做完手頭上啲野，除咗博早走之外，隱約有一絲嘅成就感，係久違咗幾多年嘅感覺？

所謂嘅魔鬼教練不過係人肉去激發返小小工作意志，大家一齊Work唔係為咗要糟質對方鬥長命，互相影響係可以有New way to go，呢種本來以為係妄想嘅工作方式，最後估你唔到可以有板有眼實踐成為理想。

圖：Shutterstock

以上文章刊於《招職》。