無立場嘅人，似乎係事無大小都被「公審」嘅社會入面生活得最從容，此類人非「牆頭草」莫屬。只要知道邊一方面較人多勢眾，自自然就跟風附喺旁邊，至少感覺企喺安全島上，唔企圖硬碰就唔會有受傷嘅機會。

職場初哥未知世界險惡，會全力咬牙切齒去針對牆頭草，佢地完全無主見之餘，仲懶理其他同事會唔會受影響，明哲保身最緊要。要新一代喺牆頭草帶領下工作，又點會服？明知跟得佢地事業上都無咩運行，左右不是人，正常嘅老闆都唔敢委以重任。心水清呢班人只能用嚟收風和必要時比少少甜頭佢地就會盲撐老闆，佢地唯一大派用場，而其他同事做唔到嘅位就係充當醜人角色去搬弄是_非，散播公司競爭對手嘅謠言。食得鹹魚抵得渴，靠擦鞋埋堆就只有承受晒呢啲醜陋嘅柯打，所以認真嘅Project就點都唔會過佢地手，有任何牽連。

其實牆頭草大部分唔係天生就喜歡做人圓滑，或者擅於講大話，但最後選擇喺人前做個無腰骨嘅真小人。

曾經何時，佢地都一定係做過有抱負，腳踏實地嘅小薯仔，唔知由幾時開始，被打壓得不似人形，忍受到某一刻嚟個絕地大反撲。但呢個大反撲Over咗，Over到番唔到轉頭，欺騙埋自己嘅理性，變成咗新嘅人格。好多時，佢地做咗咁多年人，心入面有個譜，知道喺職場上正當完美嘅路軌應該要點行。不過佢地好怯，怯於變回年幼無知嘅狀態，光明正大咁向目標行去，但會出現太多嫉妒嘅壞人去誣陷，最後咩都得唔到。

所以，不如自己成為埋其中一份子，隨時偷偷出手搞下小動作，做下毒瘤又唔使負責任，幾過癮。恃住自己做得耐，無咩嚴重過失公司就無理由炒佢。要做牆頭草都要夠頑強堅持，先可以將負能量發揮到極致。

以上文章刊於《招職》。