香港人可否規矩啲，唔好再當喺人地身上「爭取」到著數係家常便飯嘅小事。近呢幾年，發現唔少打電話嚟查詢嘅Candidates愈嚟愈多要求，想你講多啲再多啲，而內部嘅突變係多咗老海鮮員工提出古怪要求要上司為佢地做特別嘅Approval，唔批准嘅話就小心佢地會搞小動作，搞垮工作上嘅Operation令你難做，今次先講下啲Candidates有咩挑剔怪招。

「喂喂，見到你地喺網上登咗廣告，想知係單獨In定成班人In？咩人In我啊？要唔要做筆試嗰啲架？Job duties個度寫要識得某啲System，係咩嚟架？都無聽過。唔識係咪唔請啊？仲有人工呀Benefits嗰啲係點架？你講晒我知啦！Thanks！」又係無顯示來電嘅？我經常有兩個諗法，就係一，個Candidate覺得唔好意思打嚟問咁多野，所以唔想我地之後有機會睇到佢CV而知道佢係邊個；二，佢未必有心想申請呢份工，純粹問下料，所以就搏我地會聽無顯示來電嘅電話，問唔問到都可以逃之夭夭無手尾跟。

真係一句Thanks就想使死人，問唔係問題，但係問之前唔會Expect有啲問題係唔應該問？

首先要搞清楚次序，你係想嚟見呢份工，先將個招聘廣告由頭到尾好好睇一次先。我地做公營機構，或者政府工都一樣，起薪幾多同埋需要符合咩基本資格係有寫明嘅，唔好直接Skip晒淨係見到個電話就打嚟。所有嘢都係直接問最清楚，但呢啲小事就會令人好懷疑你嘅工作能力，有無嘗試過自己思考過點樣解決疑問？

而咩人In、咩形式In、In幾耐，連會唔會揀你都未知，應該話係連份申請表我地都未收到。係咪如果Group in你唔鍾意就直頭連申請表都唔遞交？如果上述會係其中嘅考慮因素，咁你係驚咗Interview，你未夠想做呢份工去令你面對到Interview過程。

喺個招聘廣告放得自己電話，都預咗會間唔中收到奇怪嘅查詢。「你好啊，我想嚟參觀下招聘職位嘅工作環境係點，睇下啱唔啱自己先再申請。」我有無聽錯？嚟參觀？拒絕後佢竟然表達驚訝，直指我地無為Candidates著想過，又係要佢鍾意先得。滿台Confidential資料，就算喺走廊貼滿嘅Notice都主要係For內部同事睇，而且每次招騁動輒幾百位Candidates，唔舉辦返一日Open day，都招呼唔到咁多人，其實，有咩可能？

喺個申請表度，有時Candidate唔Confirm點輸入都會打嚟問下，好平常嘅，不過就有人因為唔識轉個CV由Word file做PDF file擾攘咗一陣，其實Upload個CV係Optional嘅，我地建議用Word file就可以，但係Candidate堅持要俾PDF file，覺得「好睇啲」，就直接講「搞錯啊，點解只可以係Word file，你比你地HR Manager嘅Email我，我Send份CV佢睇。」先生，你唔好搞錯，我先係負責人，而且我地亦無責任一定比你咁做，唔係你講你決定然後柯打我做就得。

呢班人都有一個共同地方，就係「鍾意咁」、「覺得咁樣先係啱我」，公司唔係行個人主義，而且尊重係互相嘅，歡迎比意見，但係接唔接受係另一回事。初入職頭幾年，真係無咩咁嘅事，點樣問法都係有禮貌嘅。係咪因為選擇多咗人變咗？好多以前提住嘅基本準備、基本態度都唔見晒啦。

圖：Shutterstock

以上文章刊於《招職》。