足足加班咗整個星期，每晚咀嚼一疊疊厚甸甸嘅硬資料，喺唔夠瞓壓力就嚟爆煲嘅情況下寫成幾份終極報告。咁趕交功課，都係因為要預時間俾上司同上司嘅上司翻閱，預咗要無限次Standby等改，點知今次竟然過咗幾日只係改咗兩次Minor野，咁奇？

到下午突然收到大經理俾我一個意想唔到嘅E貓，讚我今次寫Report嘅Writing skill有大躍進，而且方向完全Fit到晒佢嘅要求。對於我呢啲小薯，當然即時有少少心雄！雖然無CC俾我嘅上司知，不過佢會開金口讚似乎係值得興奮幾秒嘅事。

幾秒過後，已經迅速冷靜落黎，其實心知肚明客套嘅讚美說話唔應該咁上心。大家身份唔同，咁忙嘅工作時期仲記得要讚美同事，係出於好心，目的都係為咗令同事加班加得心服啲，自己根本唔係被特別期待嘅一個。如是者，我地部門有位媽媽級嘅Team Head，對自己嘅手下小小事都會講「你好叻啊！」、「係你先識整呢啲Excel表架咋」、「今次又有進步啦，做得好好！」，未致於令你心花怒放，但至少聽得順耳，就算幫你做多Extra work都無怨言。不過讚得太濫，有時會令身邊嘅同事覺得你好假，有次個同事發晒茅話Supplier遲咗成個禮拜送活動物資俾我地，同上司報告話係電話係咁追人地個外判司機幾點送到貨嚟，係咁呻呢幾個月同人地合作好艱辛，個新Supplier對佢態度幾咁差劣，做野又吊兒郎當Meet唔到Deadline。大經理聽到，梗係為維護機構利益表明要追究，就叫負責同事阿波俾番啲來來往往嘅E貓做真憑實據啦！

阿波面有難色，「嗯……我一開頭係有出過E貓同佢地傾交貨Deadline，見佢地無覆，所以之後就用電話催佢地。 」無白紙黑字寫明，入唔到罪，大經理即時變阿燥，「阿波，咁我地點證明人地真係遲俾貨啊，佢掉轉頭賴你話講Deadline延遲咗都得架，你係代表緊我地機構架知唔知。你無諗過成個過程要Keep record架咩？而家咁樣好難同上面交代要停用呢間衰野，咁我地咪要逼於無奈繼續忍受佢地咁差質素嘅服務？你自己都做得辛苦啦。唉，你一知道人地有問題，有無同上司提過？」

阿波大受打擊頭耷耷，「我本身都預多咗一、兩日真空期嘅，所以諗住遲啲都無問題。我地話晒半政府機構，Supplier應該唔會做衰自己個名……咁……」，佢上司打圓場：「阿波，我知你已經好努力跟進咗成個月，你第一次跟新Supplier要跟貼啲，一有唔妥即刻出聲，我地一齊諗方法嘛，工作上我都有責任。」遇到呢種上司，做小薯嘅真係三生有幸！

不特止，打發咗大經理後，阿波上司仲喺人前安撫佢：「波仔，我知你不嬲做野都好認真，你盡咗力去令件事無去到最Worst，唔好介懷大經理講啲咩，你已經做得好好。 」咁都有位俾你入到讚人？日行一善啊？擺到明包庇下屬係好不智，明明佢唔醒目做野無留底係抵鬧，仲讚佢點點點，誤導佢令佢永遠唔知自己有幾錯。喺私人公司嘅話，佢呢啲Case令公司蒙受損失可能已被出Warning，甚至飯碗不保。

太過寬鬆等於潑出去嘅水，收唔返，下屬得寸進尺，到時想重頭駕馭呢隻野馬就難過登天啦。太過照顧佢嘅心情，會忽略咗工作上嘅推進力，反正佢幾Hea做幾肆無忌憚都無人Challenge嘅。錯用讚美，唔單止無左原先嘅功效，更會令同事「囂屎」咗，唔覺唔覺成為大家嘅共同敵人，到時先嚟後悔就太遲。

文：HR熊 ( 喺人事部工作既小妹，見盡唔少公司既「人」同「事」，係呢個平台上一齊分享職場上既苦與樂，笑與淚 )