在近期追看的日劇《小巨人》入面，呢一句說話「敵人往往會偽裝成你的同伴」好深刻，一語中的道出職場嘅黑暗。

劇中講到身為衝鋒陷陣嘅警察，但竟然社會係無律法去保護佢地。其實這情況放諸所有打工仔嘅職業都一樣，有邊個會實牙實齒去保護你？好快你會發現只有自己係可以絕對信任。

而純品嘅小熊，非自誇，更多人解讀「純品」為愚蠢和後知後覺。我唔否認，因為喺職場上唔夠謹慎眼利，自己係要承受沉痛嘅教訓。喺公營機構生活，敵人會唔會比私人公司多呢？似乎喺工作上嘅鬥爭程度係無咁緊要，人工福利晉升條件都好公開，唔會有因為大家同職級但人地人工高你一倍，大假無端多你10日嘅情況出現。反而係人事上嘅是非多到不得了，「識做」去討好上司和同事，花時間去認識各部門有利用價值嘅同事，係好基本嘅戰略。

喺小熊嘅部門，有幾位賺錢買花戴嘅廿尾三十頭女同事，就好出色地每日重複做示範。猶記得我第一日返工，她們就已經好雀躍地話要請我食飯，喺完全無理由拒絕之下當然受邀出席。一餐飯入面，問咗好幾次喺Interview時對考官嘅印象，當時嘅考官就係我而家嘅直屬經理。我都算係出於真心講返佢問得好仔細，了解我以前工作過嘅人事部門係點。不過人地想聽嘅唔係呢啲，再推進一下問題：「佢會唔會好長氣，你覺得佢個人點啊？好唔好？」

難道我第一日返工就講上司壞話嗎？見我無咩反應，就開始諗計引導我講。呢餐飯後，多多少少了解到佢地係一個主力天文台，唔會走漏眼去收集情報，點都唔可以比任何新人有機會成為經理們嘅新寵兒，從而威脅到佢地地位。

究竟呢班小花點樣鍥而不捨咁搵進擊機會，套我口風呢？下次待續。

以上文章刊於《招職》。