喺公司嘅某個角落，總會發現有個人，同其他人嘅距離感好強，當佢喺身邊走過時會散發住一股幽幽嘅哀愁，令人不安。

「阿威，搞咩啊？同事升職咁開心請食下午茶埋黎落單，一見到你個惡樣就嚇到走夾唔抖，人地做咗啲咩得罪你？」

「無野啊，我寫低咗想食咩架啦，你幫我俾番張Menu佢，我無野。 」阿威最近一直無厘神氣，無論任何人同佢講野都會先Dead air幾秒，然後冷淡回應，就好似呢個世界發生緊既事都與佢無關咁。

「做咩阿威佢好似嬲晒成村人咁架？一朝早撞口撞面行過都當睇我透明。 」我地部門僅有嘅幾位男同事聚埋一齊細細聲講，先發現佢對高層嘅態度由以往既唯唯諾諾竟然都變成唔瞅唔睬。

雖然自己一向同阿威唔熟絡，但係佢近幾個月嘅負能量強到我都好奇佢究竟搞咩鬼。明明我地部門同事相處得算好融洽，佢工作量少，阿頭又錫到佢燶，經常讚到佢唔好意思。而我地呢班日日被捽到叫苦連天嘅同事睇在眼內，不知幾羨慕佢，係工作上佢仲有咩咁唔高興？

「唉，阿威佢食詐糊啊！」事情似乎漸露端倪。

「吓？咩詐糊？同阿芬表白食檸檬？」充斥住一陣訕笑聲，可見阿威平日都唔太受同事歡迎。

「唔係啊，講緊佢以為自己有得升做Senior，點知空降咗董事個仔黎坐呢個位，人地係耶魯大學畢業，加上喺知名大公司工作過，有番咁上下實力。阿威係夠晒年資，不過際遇嘅野係咁架啦，同埋佢連Degree都無，講真都唔夠料去Fight低人……」

「咁就成個人落晒形架啦？御用皇親國戚係好閒嘅事，就算佢個經理有幾想推佢上位都好，無得保證百分百成功。 」

「呢個當然唔係最大打擊啦！佢經理應該喺不久嘅將來就同我地Say goodbye，好似話會跟佢老公學做生意，咁阿威嘅升職路凍過水啦！」

「難怪難怪，不過既然佢深明出黎工作要靠人嘅道理，無理由仲突然對所有人黑口黑面，咁搞法無人會想幫佢。 」公司地方細，氣氛好易被感染，阿威嘅負能量已經迅速覆蓋整個部門。

打工係有好多講唔出口嘅辛酸，但總會有一樣野令你稍微高興，傾得埋嘅好同事，Canteen抵食嘅飯餐，上司肯Appreciate你付出嘅努力，都可以作為一個好單純付出原因。日日咁勉強搞到皮笑肉不笑，等同受罪。等機會不如自己搵出路，無謂將壞情緒谷晒喺面上！