平日無特別事發生時，我地可以好自如地預測到直至放工一刻全日工作嘅流程係點，心情保持輕鬆。當你久而久之習慣咗一種模式，有突如其來嘅事發生時可能反應已減退，當下心底裡會有個警號響起，感覺警戒心已經一早被時間慢慢磨蝕。

反而有啲我地一直認為係「和平主義者」嘅同事，平時比較內斂，以為佢地遇到任何事都不聞不問，其實一直採取一個溫和嘅「自我保護」機制。身邊嘅小圈子是是非非，老闆高層嘅醜聞，只要唔係對自己有直接嘅影響，都可以置之不理，躲於平靜嘅世界裡面。但佢地係咪就如表面咁完全唔理解周遭發生緊咩事呢？不，佢地選擇性地去表態係唔想浪費力氣係自己唔睇重嘅事上面。

與小熊同齡嘅朋友，出嚟社會好幾年後，思想上似乎大部分都有同一個偏向。大家飯聚時由當初不停數算各自公司嘅不是，怨氣衝天，到而家大家只想盡量將時間放喺自己嘅生活意義同健康上。不過當針拮到肉時，「自我保護」模式就會發揮佢最大功用。

話說有次「和平主義者」阿春無情情要食隻黑鑊，佢上司開大會Presentation時竟然準備漏咗一份重要嘅議題，嗰一刻佢對著班大老闆們當然唔可以直認自己有錯，就好順理成章地卸咗比下屬，減輕自己嘅罪行。傳承住「有功佢領，有鑊你孭」嘅精神，一有衰野發生，就會突然同啲下屬講要團結起嚟。阿春骨子裡接受唔到任人魚肉之餘，仲要被屈做錯事，就開啟咗「自我保護」模式，佢公開地喺Office嚴正詞明咁講返自己似乎無收到需要準備漏咗議題嗰個嘅指令，Email有紀錄寫明大家今次負責做咩Task希望可以一齊睇多次了解返係咪有誤會而Miss咗，有必要搞清楚事件上嘅責任問題。

在場聽到嘅同事全部都好愕然，我地做小薯嘅差啲激動得想為佢拍掌！佢好明顯已經按捺住唔直接講自己無問題，係上司卸膊，因為呢啲字眼一出口，其他唔知情嘅同事只會覺得係無禮貌，丁點都無顧及上司嘅面子。而佢提出係想搞清楚，再一次睇番程序上係咪大家有誤解，正路大家都猜測到係咩事，佢上司亦未至於完全無落台階。

好多人都不自覺有個「自我保護」程式，即使你認為自己係幾咁脆弱，到某一刻觸及到你底線時，其實你嘅自然反應係會快過思考，立即表現咗最真實嘅你。你嘅諗法會Save喺潛意識入面，就好似有啲經常被同事欺負嘅人，心入面不停有說話咒罵返佢地，到突然有一日，一路係個心入面反擊時可能會唔小心講左咗口！所以我地要了解自己多啲，識得控制同運用最差嘅情緒，先會發揮到好效果。

以上文章刊於《招職》。