做得打工仔嘅，平日加班無錢，受氣受到盡，間唔中私底下「享用」公司資源，一啲都唔過份啊！係咪先？

喺我印象中，細細個成日聽姨媽姑姐講，屋企嘅文具從來唔使俾錢買，又新淨又齊全，而我啲表哥表姐當然好唔開心，唔會有藉口去買新款嘅鉛芯筆、卡通公仔嘅原子筆、特別顏色嘅螢光筆和文件夾等，因為永遠用之不缺。到大個出咗黎做野就會明白，有時候就算屋企唔需要用到，有得拎就拎，係心態問題。反正我額外付出咗咁多，用多少少公司野當補償囉！

一般大公司好少會嚴密監控同事使用資源嘅數量，除非一來貨就迅速無晒咁誇張，否則都唔想喺行政方面加咁多工夫。即使知道有同事間唔中拎啲文具自用，都隻眼開隻眼閉，唔想破壞大家關係，而且對佢地嚟講不過係細數目。公司政策對同事寬鬆啲，亦期望同事咁大個人會自律，少少物質無傷大雅，可以當甜頭。

最常見嘅公器私用情況當然係影印或者掃描自己嘅履歷表、所有學歷證書和工作證明，出面印一張要五毫子，如果彩色影印要一元架！同事好識做，收得好密實，可能夾埋喺一疊公司文件「順便」印埋，或者等個Office無晒人先偷雞做，俾人發現好「瘀」無面架嘛。當然老闆可以喺部影印機嘅記錄搵到「罪證」，但呢啲基本上無人捉，身邊嘅同事理解終有一日可能自己都有呢個需要。嘅然對公司無實際嘅利益損耗，擺明禁止反而令人覺得老闆好無人情味！

不過遇到太離譜嘅情況係會忍唔住白眼，曾經有個坐隔離位嘅年輕男同事偷偷將一堆白色膠File和一疊全新既A4紙放入袋，完全諗唔到佢嘅意圖，唔會係細佬妹用黎做學校勞作掛？又賣唔到啲咩錢，一星期兩次，至少我發現到嘅次數係咁。而女廁入面嘅大大卷廁紙亦係出咗名嘅「搶手貨」，平時啲女同事好怕喺廁所有任何大動作，基本上無隔聲，你做緊咩隔離果個係聽得出。見到有人鬼鬼祟祟拎住個大袋已經好令人懷疑，再喺廁格傳出拆架、打開個袋和放入袋嘅聲音，成個犯罪過程根本一清二楚！

如果公司好直接咁貼告示警告呢班人，其他唔知情嘅同事實認為公司小家，而且無證無據喺度小人度君子之腹。點可以無形又有效處理呢班積犯？用群眾壓力嚟對付佢地就最啱。除左循例定時分配和記錄低文具數量，俾同事知道咁小嘅事都係有規有矩外，亦會將多餘嘅物資，例如零食、佈置裝飾和活動紀念品等放喺當眼位置，邊個過嚟拎大家就算坐喺位都會看到，正常心態俾人眼望望係會覺得唔好意思，積犯應該學識收歛。當同事標籤咗你係貪小便宜嘅吝嗇鬼，再經八卦同事將你呢個形象一傳十，十傳百，想洗底？睇怕無咩機會。以人治人係最簡單嘅辦法，唔使成本又捉到心理，漁人得利保護番些少利益無壞。