人生本來就係有好多嘅可能性，但放喺工作上反而變得不可行？

細細個被大人問：「你大個想做咩？」答案點解永遠只得一個，大家只能一生做好一個最初Set定嘅目標。人在成長，不斷有新嘅經歷，啟發更多未被發現嘅好奇性，目標因此而改變亦係自然不過嘅事。但為咗家人嘅期望及伴侶祈求生活嘅穩定，只可以繼續困喺非人性化嘅束縛內，專心返一份朝九晚五安定嘅工作。

社會進步得緩慢，其中一個原因係出咗嚟社會工作嘅人，漸漸喪失主動學習其他事物嘅能力。斜槓( Slash ) 青年可以喺外國咁流行，有部分更加係Full time嘅自由職業者，係社會鼓勵呢一種嘅學習模式，而唔係死板咁一份工做到老死就稱得上係專業嘅極致。Slash族係依靠唔同嘅技能去賺取收入，而家資訊和科技發達，自學一招半式唔難，令我地可以較易掌握到基本技能去彈性咁返幾份兼職賺錢之餘，更拓闊眼界。對於僱主嚟   講，佢地可以喺需要人手時就外判工作出去，省時費力，又唔需要比額外嘅福利，慳到唔少固定支出。

做Slash族，睇就好自由，有決心衝出嚟都要做足事前準備，最Concern嘅一定係經濟上嘅考慮。無咗固定收入，至少要Set條底線比自己每月要賺到幾多錢去維持生計，可能仲要計算埋比家用嘅需要。當可以自由咁安排時間，好容易會日漸鬆散，要重新學會管理時間，唔好再做以往嘅窮忙族。無咗直屬上司指點你，唔會再有同事長時間同你拍住上，所有決定同後果都要自己一力承擔。接嘅工作都係想做想學習嘅，心情暢快之餘要認真Build up自己嘅Branding。這就同經營公司一樣，要顯示到你嘅實力，你嘅價值就會倍增。

以前做又三十六唔做又三十六，好多Task當交功課做完就算數。做咗Slash族嘅話，今日同你一齊做Slash嘅同路人或者請你嘅僱主，他朝可能有意想不到嘅合作，認識嘅每個人唔再只係萍水相逢。每日出門去接受新事物嘅刺激，即使節奏更加忙碌，你會發現唔再抱怨，而係想不斷發掘同爭取新嘅機會，令默默低頭嘅自己煥然一新。

打工仔話就話穩定，就算喺大公司工作，分分鐘突然有一日被炒魷魚，問題未必在於你，但要面對嘅就只有你自己。如果當下懼怕唔能夠搵份相等嘅工作，就會變得一無所有，人生係咪就只能被動地受控制？

所以，為咗麵包，就算唔係做Slash族，我地都唔可以咁單一只集中發展一方面嘅技能。

圖：Shutterstock

以上文章刊於《招職》。