有無發現，打工仔轉工嘅主要原因，除咗係想升職加人工之外，仲想逃離惡頂上司嘅魔掌⋯⋯而仲未走得甩嘅，就會同同事圍爐講下上司是非。喺職場上遇到好上司嘅機會率似乎偏低，唯一方法就係自己做埋人哋上司，以身作則，但係咪咁容易先？

究竟做上司點先叫好，先可以令下屬開開心心留低工作？以下11個特質，你嘅上司 / 作為管理人員嘅你有幾多個？

1. 能夠清晰表達工作嘅目標

雖然坊間經常講「躺平」，但普遍打工仔埋到位做嘢都係認認真真，同時想喺工作上搵到成功感。而好多時管理層嘅唔清晰會令下屬非常不安，如果上司可以向同事清晰表達工作嘅目標（objective）係咩，令員工有個清楚一致嘅方向，工作亦會順利啲。

2. 識得設定恰當嘅業績標準

有清晰目標，員工就唔會迷失方向，唔使估估下自己要做啲咩。而大部份公司會設定KPI（Key performance indicator），等員工喺工作上面有一個更清楚嘅指引，上司亦可以根據經驗同項目需要，同下屬講有咩具體工作可以做，當然唔需要佢哋盲從舊方向，等同事可以發揮創意。

3. 適時提供意見

培訓同教育下屬係上司嘅責任，有時忙起上嚟，同事一味埋頭苦幹，未必意識到自己做嘅嘢係咪可以滿足要求。如果上司能夠及時畀到意見同指引，係有助提升同下屬嘅關係，亦建立到一種可以對話同合作嘅氣氛。

4. 擁有同理心

相信無幾多人會想同成日高高在上又mean又cool嘅上司相處，當然上司亦唔需要做到好好恰咁嘅樣。相對地，能夠體恤到員工嘅需要，將心比心，做得好就讚，做得唔好就建議可以點改善，相比有彈無讚，有錯必鬧一定更好。同事開心啲，壓力少啲，表現都好啲。

5. 睇到同事嘅努力

一個好嘅上司總會見到同事嘅努力同做得有幾好。無論係high tier嘅升職加人工，抑或係low tier嘅Lunch / Tea time萬歲，都係一種畀同事睇到嘅認可同獎勵。

6. 關心同事嘅職涯同生活

作為上司，工作除咗開會同計劃方向之外，仲有人事管理（people management），同事用心工作，都係為咗升職加人工，讓下屬見到一條清晰嘅career path係非常重要。除咗升遷，亦會藉住短時間嘅相處，令員工感到被重視，例如見面打個招呼，問下有咩興趣，吹下水，了解同事嘅生活，拉近大家嘅距離。

7. 識得控制情緒

「你有壓力，我有壓力，人人都有壓力！」但無論你幾嬲幾受氣，都唔應該將情緒發洩喺下屬身上，就算下屬做錯咗，最重要都係解決問題，而唔係解決個人。如果你都做過細，都知無啦啦受一棍係幾難頂㗎啦⋯⋯

8. 建立「好玩」嘅工作氣氛

工作佔據咗生活大部份嘅時間，而同事亦係見得最多嘅人。想工作環境氣氛好，作為上司可以得閒搞下Team lunch，同同事夾下定時定候買生日蛋糕同同事慶祝，過時過節畀大家裝飾下office，呢啲相比特登抽weekend時間做Team building更加可以建立到一隊Team。

9. 做決定要果斷

當有重要事需要上司做決定嘅時候，你哋嘅上司點會處理？拖字訣（「唔得閒住再覆你。」）？抑或拋返個波畀下屬（「你哋決定啦我無意見～」）？作為一個好上司係應該果斷，而唔係拖拖拉拉，或者轉嫁責任。做嘅決定未必一定係100%正確，錯誤可以修正，但優柔寡斷、推卸責任係會影響同事點睇你。

10. 同事唔怕同你溝通

如果你係一個好上司，你嘅下屬應該唔怕搵你傾計，或者帶住問題搵你。工作一定會有問題發生，而唔係下屬可以自行處理，呢個時候佢哋會需要上司嘅意見，但如果平日問問題嘅後果係畀你責罰或者帶嚟更多問題，員工有問題又點會提出，只會到事件引爆先知。

11. 同下屬分享成就

「做嘅係下屬，領功嘅係上司」呢個係令打工仔最沮喪嘅事。作為一個團隊領導，千祈唔好忘記或者忽略同事點為project打生打死，更加要公開表揚做得出色嘅同事，令佢哋覺得自己係有teamwork，而唔係單單一個齒輪。

做上司真係唔容易，但好似蜘蛛俠電影咁講：「能力愈大，責任愈大」，你已經唔係往日嘅薯仔，而係一個管理人員，加油！