當你拿出你僅有「樽鹽」來，抬起你低過的頭來，同老細宣布：「老細！我唔做喇！」由呢一刻開始，你離自由嘅日子，只係差一個辭職通知期。辭職嗰下或者真係有少少爽，除非你份工唔使通知期啦，唔係你仲要經歷一個漫長嘅通知期先可以重獲自由。

正所謂「今日留一線，日後好相見。」呢個世界好細，今日嘅離開唔代表從此不相往來。無論為咗你自己個人嘅名聲、還是為咗你身邊嘅同事都好，離開之前請做好本份，再嚟個華麗轉身漂亮地離開。

1. Handover要靚仔

以前讀書就話有：「我輕輕的走了，正如我輕輕的來。」但係嚟到現實嘅打工世界，就算我輕輕的來，都一定唔可以輕輕的走。遞完封辭職信，爽一陣好喇，下一步你就要諗下點樣Handover。如果有人可以即時接手你啲嘢都還好，但如果冇嘅，你唯有清埋啲嘢，寫定幾張紙仔留比下一手。

試想下如果你去到新公司，上一手Handover亂到七彩，你完全唔知從何做起，畀著係你都可能會詛咒佢。做個負責任的人，走之前嘅Handover，要盡力做得靚靚仔仔。

2. 保持良好關係

辭咗職之後，你可能會覺得自己好似食咗星星嘅Mario一樣，進入咗無敵狀態。有啲人真係會以為自己無敵，辭咗識就態度惡劣、應做嘅嘢都唔肯做，結果攪到同同事、上司嘅關係都變得好差。其實辭咗職唔係無敵，老細狠啲嘅話都可以炒咗你，賠少少錢比你早啲走。被人炒事少，個底花咗事大，你可能會冇咗封靚靚仔仔嘅Reference letter，亦都會冇咗個人嘅名譽。因少失大何必呢？

3. 執好個位

唔知大家有冇試過喺新同事返工之前，要幫手去執位打掃？我就試過好多次。當離開一間公司嘅時候，有人可能走得比較怱忙、有人可能闊佬懶理，結果成個位亂到七彩要搵人執手尾。如果你唔能夠輕輕的走，都留個機會比人輕輕的來，請執好個位，留下一片美好嘅雲彩。

4. 清理不能說的「Mimi」

除咗清理個位，唔好唔記得要清理個電郵信箱。喺公司，有好多嘢唔方便講出口，大家就會經電郵溝通。喺呢啲絕密嘅電郵入面，可能包含咗老細嘅花名、大量不滿及夾雜大量助語詞。但大家好多時講完之後都興奮到唔記得刪除，直到有人離開，老細接管電郵信箱之後先被發現。為曾經同你同仇敵愾嘅同事著想，離開前請記得清理電郵。