筆者最怕參與嗰啲跨部門或團隊合作嘅Project。點解？唔知係咪自己嘅工作運係咁，十有八次都遇到啲Hea做、低效率、求其及卸膊嘅人，幾乎每次都要搞到吵大交。不過，同人嘈之前都要先了解清楚對方嘅後台，否則即使你贏咗場交，但最後都會成為終極輸家。

喺公司入面同其他同事，尤其係嚟自其他部門嘅同事要爭拗一樣嘢嘅時候，又或者要同佢地「開火」前，一定要停一停諗一諗。因為喺你開火之前絕對係要清楚知道對方嘅老細係邊一個，又或者複雜啲去睇究竟佢背後嘅關係圖係點。因為有時你以為佢係Small potato，其實可能佢後台強勁而且仲係老細嘅紅人或親朋！如果你冇後台而立亂「開火」，結果你把槍就變成蠱惑的槍，射返自己！

筆者就曾經試過喺公司入面，因為對方成日畀啲錯嘅資料，結果累到我當然做出來嘅Report有問題。當我向對方「開火」嘅時候，先至發覺原來佢就係大老闆嘅姪仔，後來有一日食Lucnh撞到秘書小姐，佢先話我知！結果嗰一次對方老闆回贈我一個精簡而又好到肉嘅Email：

「新人嚟到好多嘢仲未上手，你咁有經驗嘅員工係好應該比啲耐性佢哋，教導佢哋。你都做過新人，你應該都會感受到。況且你咁Professional，冇理由收到錯嘅資料你都唔知、會睇唔到 ！所以希望你下一次收到嘢嘅時候都睇清楚先至做嘢。」

當收到呢一封Email嘅時候，我嘅憤怒同鬱結指數立即爆表！簡直可以吐血吐出一幅清明上河圖！

我問心嗰句大老闆講嘅嘢一啲錯漏都冇，根本就冇藉口反駁！雖然話我哋可以分析啲資料啱唔啱，但係如果我根本就冇方法確定呢啲Raw Data係啱定錯，呢舖咁當然係要硬食啦！所以勸勉大家一句，「開火」前唔只要睇準目標，仲要睇清楚目標後邊係乜嘢！否則最終害到自己！最重要嘅係對方已經認定你係一個麻煩友，以後喺公司日子你都唔方舒服。你Challenge過人一次，人哋一定會搵機會「入」返你！所以，無論你係公司內嘅邊一層，都千祈唔好亂「開火」啦！