正所謂你當人知己，人當你妲己，喺公司入邊要真正識到交心嘅朋友大家話係有可能定冇可能呢？

當一個人無論佢係大學畢業生 ( Fresh Grad ) 定係已經做咗好多年嘢，初到貴境去到一個新嘅工作單位，好容易會產生很多幻覺。呢啲幻覺就係個個都對你好好，以為個個都同你好Friend好十卜你，但係經過時間嘅磨練，大大小小嘅事情發生之後，你先至會知道究竟邊啲先係可以進一步建立友誼。

當然做咗幾年野嘅人，除非佢心地極度善良先至會敵我不分，否則初出茅廬嘅朋友仔會比較容易中招。仲記得我初初出嚟做嘢嘅時候，以為個個都係朋友，有咩都同佢哋講同佢哋呻。如果唔係喺廁所門口、後樓梯、放工行去地鐵站嘅時候聽到呢一啲嘅說話，我都仲以為呢個世界上只有好人。

一班老海鮮好多時擺出一副慈祥嘅外表同你講公司有啲咩要注意，又話有咩可以同佢哋講等佢哋可以比意見同幫吓你。其實聽完之後佢哋成日都會喺你背後話你戇居、幼稚、白癡等！不過最重要都係大家記住千祈唔好講啲同錢銀有關嘅話題！我記得以前有班同事每個月都會走埋嚟問你出咗幾多錢糧，唔知以為佢好心幫你計吓有冇被公司攞咗着數。但其實係要計吓自己有冇被人攞咗着數！當然數目字上面出現落差嘅話，佢哋就會黑面同埋會同老細講是非。

當你被老細捉入房鬧嘅時候，你就知道究竟你所謂嘅朋友知己已經出賣咗你！其實呢啲都係事少，對錯人講錯是非後患更加無窮！所以我成日都警惕自己，喺公司入面你可以跟同事Friend但係絕對唔可以認做知己，除非大家已經唔喺同一間公司工作！

以上文章刊於《招職》。