每日返到公司，最怕聽到一個字：急！無論係同事定係老闆都成日聽到佢走埋你個位，或者喺個電話入邊同你講呢樣好急，快手搞！但係我諗大家一日入邊都應該聽到唔止一次急字！

你又急，佢又急，究竟邊個急啲啊？講都還好，可以當耳邊風，轉個頭話唔記得咗甚至乎話冇聽過都得！但係出動到電郵有晒Black and white，就真係避無可避啦！但係Send電郵出去之前真係要諗清楚點樣寫！點解？因為個個人喺電郵個Subject line都寫「Urgent」，咁多Urgent case咁應該覆邊一個先好呢？

真係唔係講笑，以前我喺大公司入邊作為一個小職員，見到發郵件嘅人寫「Urgent」都收唔到效果嘅時候，佢哋就會開始喺「Urgent」前面加一個字；情況就好似電影情節入邊... ...如果非要喺呢一份愛加上一個期限，我希望係一萬年一樣咁。而佢哋喺Urgent前面就係加咗一個「Super」！佢哋以為咁樣就會好似呃小朋友咁，咁容易呃到我？大佬呀唔係淨係你先識得加字......視乎對方嘅語文能力，我收過「Super Urgent」、「Top Urgent」、「Very Urgent」，甚或簡單出四大金剛：「ASAP」！但係三隻小豬同狼來了嘅故事大家都聽得多啦，你估個個都咁豬嘅咩！

經過咁多年嘅「Urgent case」洗禮過後，我比啲貼士大家，其實重點係放喺「Urgent」後面而唔係前面！首先你真係要比個時間Deadline喺入邊，第二就係要指名道姓！例如：Urgent! Need confirmation from all department head before lunch today. 

「Urgent」其實已經變咗一個助語詞，完全冇意思，要講就講出重點！邊個？幾時？做乜？大家諗下如果比你睇到上邊個例子，你係收件人你夠唔夠膽唔第一時間 / 或者聽聽話話喺Deadline前覆呢？