人在職場，見同事時間多過見屋企人，唔少人搞旅行都會邀請傾得來同事Connect同行，既可以熱鬧啲又可以分擔旅行成本。但現實情況係唔少人與同事因為一次旅行而反目，唔想做職場「和你飛」苦主，就要事先檢視三大同行條件。  

合拍度「詳測」 
人在工作間，同事們都盡量保持客客氣氣，有「真心」想法都會收在心底。但當場景改為旅途上，真性情就難免不自覺外露。於是不少職場「和你飛」苦主會驚覺，平日順得人又樣樣都好像無所謂的同事，一起出遊原來是如此挑剔兼且係牢騷王，結果成為雙方反面的導火線。  



所以評估與同事合拍度，不能單靠平日相處經驗，應該從優閒活動進行「詳測」。除了邀請同事一同參與假日優閒活動如行街、睇戲又或戶外活動，進階一點係先來一次小旅行，例如三日兩夜的澳門或台北快閃之旅，假如短短三日大家相處都湧現不少小問題，你大概可以想像到七日之旅大家只會磨擦不斷吧。  

徵求同行者意見 
邀請同事外遊出事另一導火線，是其他同行者與這名同事唔夾。其他同事者可以係你家人、朋友甚至最關鍵的另一半。  

人夾人確實係高深學問，這名同事和你夾得來，卻可以與你的同行者「水溝油」。所以基本一步係在出發大半年前，你就應該安排優閒活動讓同事與同行者互相認識，再找機會認真詢問他們對同事的印象，要留意第一次詢問，同行者未必會肯講真心話，最好之後再旁敲側擊打聽他們對同事的印象，當然同時你亦要打聽同事對同行者的印象，有足夠把握彼此都接受對方可以成為旅伴後，再正式邀請同事成為旅行團成員。  

作最壞打算 
在職場搵食永遠都要「作最好的準備、作最壞的打算」，所以即使同事符合上述兩項條件，你都要評估自己對最壞情況的承受度。  

所謂作最壞打算，就係指萬一與同事反目，自己能否承受在工作間多了這名「仇人」。一般而言，大家職級咁高咁大而彼此屬於不同部門會較安全，但如果對方係會計部、行政部等揸數搞手續的把關團隊成員，你多了這名「仇人」就很危險。另一風險係對方與公司當紅管理層相熟，甚至是公司內星級團隊成員，後對方反目都只會對你有百害而無一利。  

了解上述三大條件後，相信你都會明白一個道理，就係與同事一齊去旅行只係搵來搞。所以除非你自問係面面俱圓、交際手腕達化境的職場高人，否則邀請同事一齊去旅行還是可免則免了。 

文：Peter Cheung