日炒夜炒，無運動，巨型啤酒肚，勁過大肚婆。左穿右插，無閱讀，語言乏味，悶死隔籬，又唔打得。唔想咁樣，可以點樣？培養好習慣，原來有方法，就是培養所謂「迷你習慣」( Mini habits )。

讀書時代，學乜都識，極快上手，何解？因為填鴨制度，課程斬件上。三歲蒙童，學英文，逐個字母學，由A學到Z，按部就班，學識一個到下一個，自信心慢慢建立，成就感與日俱增，學習熱情漸漸升溫。反觀，如果一開波就要成本《莎士比亞全集》熟讀，難度太高，讀唔入腦，心情沮喪，自暴自棄，「拷乜除 ( How much？)」都未必學識。

道理好簡單，只是人大咗，初心退卻，減肥、睇書、執屋都好，訂目標時好有長官Feel，好高騖遠，最終落唔到地。新年新願望：「我要減廿磅」，頭七天，日日煲《瘦身男女》自我激勵，端上至愛甜品亦能坐懷不亂。可惜半個月後減得半磅，只能慨嘆：「一二三四五六七，多勞都係唔多得。」故態復萌，甚至變本加厲，衰過未減之前。

正確的做法，應該改為培養「迷你習慣」。《驚人習慣力　做一下就好！》的作者蓋斯 ( S. Guise ) 自身經驗，足堪借鑑。蓋氏自離校園後，始終無法培養出持久健身的習慣，意志力像段譽的六脈神劍，時有時無。某日在家照鏡，啤酒肚鋒芒畢露，悶悶不樂，忽然靈光一閃，大叫曰：「掌上壓30吓太難，只爭朝夕」，悟通與其不斷天人交戰，不如說服自己，「千里之行，始於足下」，做一吓掌上壓，都好過零吓。

跟物理的原理一樣，東西從靜止到要動起來，是阻力最大的時候，而當事情開始進行，因為動能的緣故，事情會變得較容易。

蓋斯「排除萬難」完成了第一吓掌上壓後，諸聰明的讀者應該好易估到之後的情節。做完一次，感覺良好，不知不覺，做多幾吓。然後得隴望蜀，想去做引體上升。大腦當然反對，蓋斯說服自己：「拉一吓啫，唔緊要啦」，大腦開綠燈，結果案件重演，一吓變成幾吓。如是者，無痛改變，身體、意志，慢慢入局，半年後，持續蒲健身室亦無難度。

培養「迷你習慣」的好處，由於目標設定得低無可低﹙一吓掌上壓，除非大病初癒，否則十拿十穩﹚，極易說服自己，開咗個頭先，免除內心掙扎。再者，人性貪求滿足感，目標達成，就算一吓掌上壓都好，感覺都會良好，不知不覺中建立起良性循環。原理跟讀BB班時寫完一版A字，老師剔剔剔，猛讚「叻叻豬」。完成動作，立得獎勵，培養新習慣的阻力，自然土崩瓦解。

只做一下就好，小到不會失敗，好習慣自會慢慢養成。

圖：Shutterstock

以上文章刊於《招職》。