大學畢業生及DSE考生，不少都會考慮投考紀律部隊。想找出適合自己又夠筍的紀律部隊工？不妨用大數據比對一下。

邊個紀律部隊請人最積極？竟然唔係警察

過去數年警察都積極增聘人手，加上各區警署都貼上全年招聘海報及Banner，令大家有個印象紀律部隊中，請人最積極的一定係警察。

不過參考紀律部隊2019至2020年人手編制預算，六大紀律部隊及廉署合共新增職位達622個，而其中海關佔186個，稍為跑贏警隊的179個新增編制職位數目。

雖然海關請人最多，但論數目都只係多少少，所以認為今年考海關值搏率較高，你就未免太天真。不過從逆思考角度看，由於考海關體能要求較高，這一關每年都會淘汰不少人，自問夠Fit的話，今年海關請人較多，又確實可以增加勝算。

講薪酬，邊個紀律部隊最吸引？

睇完空缺，另一關鍵數目當然係睇薪酬。唔少人都知道警隊入職人工高一截，令不少準畢業生都視警隊為首選紀律部隊筍工。計員佐級的話，警員入職人工24,110元，確實較入境處、海關、消防及懲教二萬頭高一截；但主任級的話，海關督察及消防隊長入職人工達39,310元，算是警隊督察 ( 42,665元 ) 以外的高薪選擇。

宿舍係遙遠甜頭

樓價高企，令不少年輕人投考紀律部隊，其中一大誘因是成家立室後可以申請宿舍解決土地問題。不過要留意紀律部隊宿舍長年供不應求，平均輪候時間長達六年，較輪候公屋更長。當然有得等都總好過無希望，曾有網民分析指警隊人多，理論上獲可獲分配較多的紀律部隊宿舍單位，但要留心正因為警隊編制逾3.5萬人，即使獲分配較多宿位仍會有僧多粥少效應。

參考紀律部隊興建宿舍消息，原來海關興建宿舍計劃已有三個，分別是提供136個宿舍的魷魚灣海關宿舍、306個宿舍的茅湖仔海關宿舍、提供175個宿舍的黃大仙海關宿舍，再加上獲分配102個宿舍的觀塘前房屋署職員宿舍重建計劃，海關宿舍的配額其實亦很可觀。

如果你講求「工作生活平衡」

有學歷、有體力的準畢業生，自信考任何一個紀律部隊都手到拿來，可能會關心哪個紀律部隊較為「Work-life Balance」。參考公務員事務局在2017年公布的數據，原來紀律部隊按五天工作安排職員百分比，警隊為50.3%，海關為42.9%，入境處為58.8%，懲教更只有13.9%。但消防就有96.8%，政府飛行服務隊更達百分百。要實現「Work-life Balance」的話，就要考慮五天工作百分比這一環了。

以上文章刊於《招職》。