諗sir你好，本人係近月收息101生，上堂時間緊逼，唔想阻礙其他同學，所以選擇用電郵請教。本人50+，自由工作者，近一年生計受嚴重影響，現時主要靠太太人工撐住大部份支出，不過都係合約員工，隨時都有不續約風險。

收人來源：一家三口，本人不穩定收入$10k~35K，太太人工$50K，女兒19歲學生。

樓一間：估值$800萬左右，尚欠$350萬左右，早半年轉按後，現供$15000（相信短期內都唔做動作）

現金：只得$80萬流動資金

上完一堂之後，想買債基，先增加現金流，每月補貼現時生活所需，待疫情過後再作打算，請問諗sir意見，此情況下，先買幾多債基，槓幾多才合適？定等上埋收息103，找一隻高息回報才入市？或上其他股票買賣課程，尋找短線資金機會？

本人自知財力不足，條件有限，亦煩請諗sir比個適合本人現時狀況的意見。

後話：本人少投資，全靠諗sir同近年較清閒，才吸收不少投資知識，雖然遲但總好過唔做。本人有間無限公司，方便工作之用，是否將其改為有限公司，為女兒每月出人工一份，待半年後，如有部份資金，利用女兒名，投資一間樓，為女兒鋪設後路？

**較早前，諗sir在網上介紹小米期權，預測準確，不得不讚！不過本人唔識買賣期權，所以並無跟進，現時已經回落，更加證明唔識唔好亂咁跟買。

希望諗sir能提供意見

並祝成家生意興隆，各人身體健康！

答:

讀者半世人唔投資，今年真係咪亂搞。就當收息課學到的方案，建議只小本投資，例如找銀行唔槓桿咁幾十萬實行，或103後跟證券行由40萬開始都可槓桿去收12%-15%年息都好，開始時務必小本投入。

不太建議用阿女名買樓，其實而家只樓一間，仲有太太名未用現階段唔好用女兒名。令人憂心是: 阿女知道自己有樓係女唔努力上進，咁就害佢一世。諗sir眼見，有些畢業生的工作積極性成疑，通常屋企對佢財務支援太大，令年青人錯失發展事業最佳時機。

讀者將公司轉為有限公司，股份留自己，董事轉做家人。執靚自己盤數去部署買下一間樓，此為上策。由於資金唔多個人能力有限，所以2047香港大限，轉錢走去海外，這些都唔關讀者事。留係香港做業主與全香港人冒共同風險，至少比上不足比下有餘，亦冇人咁得閒去清算讀者。當然好似尋日個案位仁兄，佢淨資產值在2000萬之上，將錢收到另一國是有效益的。人難以判定誰高誰低，不過點配置錢才有效益就可計出黎。

利用買樓003的借貸力由無變有之法，能加大個人工資令借貸力上升。當然你20k人工加到200k就冇可能，銀行職員盤兩句你好易漏咀。然而大一倍不少人做過，希望讀者明白借力打力才是輕鬆之道，死力牛只找到存在感，但要輕鬆就要轉換將錢為你工作。

短線投資機會不適合讀者，對於初心而不肯果斷止蝕的人，投資只宜細注同埋不要抱大希望，以為買隻股放5年會自動有首期，咁諗就太少看社會了。同意讀者先用債基，由於資金有限，利用收息103於證券行低入場門檻咁40萬去槓至80萬收息適合佢。而銀行一般太細銀碼唔肯做，讀者不要盡用全幅身家咁去銀行槓桿，還是少本先在證券行做妥當。

另外大哥請留意，派最高息的普遍伴隨高風險，相信讀者只可接受中風險，即槓埋只派10-12%年息而槓桿比率只1槓1的方案。亦需注意，股票市場有更多「微信女」同「財演」，為了討好上市公司大莊去提供方便合法地拎走你副身家。這些新聞每年可見，不重覆。

50萬投入收息約12%，一個月都多了5000蚊月入，賺返哂學費仲可以每月幫助讀者支出。先做好每月被動收入，然後希望可以將自住樓加按多些錢出黎，累夠首期讓讀者再買下間樓，令自己老有所倚，相信讀者老黎都唔想煩到仔女。

你的諗sir上

2012年創立成家投資網上課程，收息101課程教授學生超6000人，學校於2017年成立分校。諗sir訪問見於viuTV(投資諗法)、TVB(兄弟幫)、nowTV(息賺)、經濟一週、親子王國(網上)